Святы Айцец супраць “зачысткі” Касцёла

Хрысціянская любоў вельмі канкрэтная, гэта не софт-каханне з тэленавэл, заўважыў Францішак 11 лістапда 2016 г. падчас ранішняй Эўхарыстыі ў капліцы Дому св. Марты. Папа перасцярог вернікаў ад тых ідэалогій і інтэлектуальных плыняў, якія ажыццяўляюць “зачыстку” Касцёла, нагадваючы, што крытэрыем хрысціянскай любові з’яўляецца “Уцелаўлёнае Слова”.

Пантыфік спаслаўся на літургічнае чытанне з Другога паслання апостала Яна (2 Ян 4-9) аб прыродзе хрысціянскай любові і заўважыў, што сёння слова “любоў” выкарыстоўваецца настолькі часта, што амаль страчаны яго сапраўдны сэнс. Любоў абмяжоўваюць да нечага філасофскага і абстрактнага, у версіі “софт”. Хрысціяне ж вераць, што сапраўдная любоў увасобілася ў Слове. “І гэта наша ісціна: Бог паслаў свайго Сына, Які ўцелавіўся і вёў жыццё, як мы”, - нагадаў Францішак і дадаў, што “адзіны спосаб любіць, як любіў Езус – бесперапынна выходзіць са свайго эгаізму і імкнуцца да служэння бліжнім”.

Папа папярэдзіў, што “тыя, хто не хоча любіць, як Хрыстус любіць сваю нявесту, Касцёл, з уласнай плоццю і даючы ўласнае жыццё, любяць ідэалагічна”. Яны “ствараюць тэорыі і ідэалогіі, рэлігійныя прапановы, выдаляючы Цела Хрыстовае, выдаляючы Цела Касцёла, затым ідуць далей, разбураючы супольнасці, руйнуючы Касцёл”. Калі мы пачынаем “тэарэтызаваць” любоў, прыходзім да Бога без Хрыста, Хрыста без Касцёла і Касцёла без людзей. Усё гэта Францішак назваў “зачысткай Касцёла”. 

Пантыфік заклікаў вернікаў адмовіцца ад “абстрактнай любові” на карысць любові сапраўднай, падмацаванай справамі міласэрнасці.