Պրիւքսելի մէջ պիտի ներկայացուի Արցախը:
Պրիւքսելի մէջ նոյեմբեր 16-19 տեղի պիտի ունենան Արցախի օրեր: Ինչպէս նշած է ՀՅԴ Հայ դատի Եւրոպայի յանձնախումբի հաղորդակցութեան պատասխանատու Պետօ Տէմիրճեան, այդ օրերուն բազմաթիւ ձեռնարկներ նախատեսուած են:
«Նախ նախատեսուած են քաղաքական հանդիպումներ տեղի պատգամաւորներու, այլ պատասխանատու անձերու հետ: Հանդիպումներ պիտի ըլլան քաղաքագէտներու, դիւանագէտներու, ակադեմիկոսներու հետ: Կը ներկայացուին ղարաբաղեան վերջին զարգացումները, Արցախի 25-ամեայ անցած ուղին, պետականաշինութիւնը»,- ըսած է Պետօ Տէմիրճեան:
Քաղաքականէն բացի, նախատեսուած են մշակութային ձեռնարկներ, պիտի ներկայացուին Արցախի զբօսաշրջութեան հնարաւորութիւնները, ինչպէս նաեւ արցախեան արտադրատեսակները:
«Տնտեսական տեսանկիւնէ երկու մեծ, կարեւոր նախաձեռնութիւններ կան: Առաջինը Արցախի զբօսաշրջութեան ցուցահանդէսն է, երբ Պրիւքսելի ճամբորդական գրասենեակներուն պիտի ներկայացուին հանրապետութեան զբօսաշրջային հնարաւորութիւնները: Արցախը զբօսաշրջութեան համար պիտի ներկայացուի որպէս այլընտրանքային վայր` լեռնագնացութիւն, հովիտներ, բնութիւն եւ այլն»,- նշած է Պետօ Տէմիրճեան:
Պրիւքսելի մէջ տեղի ունենալիք Արցախի օրերու ծիրէն ներս պիտի ցուցադրուին ղարաբաղեան խմիչքներ, անուշեղէն, գորգեր: Պետօ Տէմիրճեան ընդգծած է, որ այս նախաձեռնութիւնը տարիներ առաջ սկսած գործի շարունակութիւնն է: Այս անգամ Պելճիքայի մէջ Արցախի օրերը պիտի իրականացուին մեծ շուքով:
«Այս ձեռնարկներու ծիրէն ներս Արցախը պիտի ներկայացուի ոչ հակամարտութեան տեսանկինէ, ի վերջոյ Արցախը միայն պատերազմ չէ, այնտեղ կան մարդիկ, որոնք կը կառուցեն իրենց երկիրը, ունին իրենց մշակոյթը, սովորոյթները, զբօսաշրջութիւնը: Ահա նպատակն է բացայայտել այդ ամէնը: Ատոր հասնելու համար պէտք է խօսիլ Արցախի այլ կողմերուն մասին եւս: Այնպէս որ, կը կարծենք` այս ձեռնարկները եւրոպացիներուն հնարաւորութիւն պիտի տան իրազեկուած ըլլալու Արցախի մասին»,- աւելցուցած է Պետօ Տէմիրճեան:
| All the contents on this site are copyrighted ©. |