Në pragun e Lumnimit të Martirëve, në Shkodër, u mbajt një koncert kushtuar këtyre dëshmitarëve të fesë e të atdheut që nesër më 5 nëntor do të lartohen në nderimet e altarit, duke u shpallur nga Kisha të Lumë. Mbi koncertin nga Shkodra të ndjekim shërbimin e Klaudia Bumçit....
“Fra Bernardini xhelatët i ka falë, por xhelatët falje s’kanë kërkue”. Fjalët e poezisë së Angjelin Dedës, kushtuar françeskanit të madh, poet, muzikant, bashkëmbledhës i “Visareve të Kombit” me atë Donat Kurtin, sintetizojnë historinë e treguar me tinguj e vargje, në koncertin e orës 17.00 të së enjtes, 3 nëntor, kushtuar martirëve në Kishën e Madhe të Shkodrës, katedralja e Shën Shtjefnit, edhe ai martir, i pari që e dëshmoi Krishtin me gjak. Zërat profesionistë të Korit Prenk Jakova, drejtuar prej vitesh nga Gjon Shllaku, vargjet e poezive të interpretuara me mjeshtëri nga atë Valentin Rroku dhe nga Tomazin Delija (nipi i piktorit të njohur Lin Delija), ansambli i dhomës së Universitetit të arteve në Tiranë, me dirigjent Lorenc Radovanin, koncertmaestri Eugjen Kraja, solistët dhe këngëtarët e çuan publikun, që, megjithë shiun e vazhdueshëm, e kishte mbushur mjaft Kishën, nga himni për martirët, kompozuar nga Gjon Shllaku, në “Ave Marinë” dhe në “Agnus Dei”-n e Prenkë Jakovës, në poezinë “Mars 1945” që seminaristi Mark Cuni ia kushtoi “poetit të ambëlsisë” don Ndre Zadeja, në vargjet e Fishtës e në tingujt e atë Martin Gjokës, për të vijuar me poezi e muzikë kushtuar martires Marie Tuci, por edhe me pjesë nga kompozitorët e mëdhenj botërorë si Bach e Mozart.
Ishte koncert për të lartuar drejt qiellit vlerat e martirëve, që dhanë jetën me emrin e Krishtit në gojë, por ishte edhe denoncim për atë pjesë të shoqërisë shqiptare, që akoma nuk i ka bërë llogaritë me të kaluarën e vet, për ata që “akoma s’kanë kërkuar falje” për krimet e kryera gjatë komunizmit. E prezantuar me shije nga Rajmonda Marko, kjo pasdite u dha të pranishmëve grimca nga jeta e martirëve, u ushqeu shpirtin me tingujt që u thurën atyre lavde, e para se të përfundonte me “Gloria”-n e Vivaldit, i ftoi shkodranët t’i luten së bashku me korin Zojës së Shkodrës, me fjalët aq të dashura të traditës.
Himni i Martirëve
Për fe e atdhe gjithë jetën punuet,
me kryq e libër hytë në çdo shtëpi,
para xhelatit ju kurr s’u dorzuet,
petkun meshtarit ja ruejtët n’pasterti.
Kur para plotonit ju thirrtë “Rrnoftë Shqypnia”
Kjo thirrje e skalitur në çdo zemër mbet
Për ju n’mur të gjakut u shkrue historia
Kur thirrët fuqishëm: “Rrnoftë Krishti Mbret”.
Të pafetë rrënuen kisha, shkatrruen Kuvende
Dogjën e vranë pa pasë kurr pendesë
Por feja qëndroi n’çdo zemër e mendje
Se vepra e juej gjithmonë jepte shpresë.
N’lumni t’Parrizit në qiellin e lirë
Ju thirri në fron ju pavdeksia
Aty, ju vendin e keni martirë
N’elterin e vet ju mban sot Perëndia.
Teksti Angjelin Deda
Muzika: Gjon Shllaku
All the contents on this site are copyrighted ©. |