Засяродзіцца над сапраўдным сэнсам слоў “Хлеба нашага штодзённага дай нам сёння” заклікаў вернікаў Святы Айцец падчас агульнай аўдыенцыі 19 кастрычніка 2016 г. на плошчы св. Пятра ў Ватыкане.
Разважаючы над урыўкам з Паслання св. апостала Якуба (2, 14-17), Францішак адзначыў, што “адным з наступстваў так званага “дабрабыту” з’яўляецца замыканне людзей у саміх сабе, абыякавасць да патрэб іншых”. “Гэта робіцца, перш за ўсё, каб увесці ў падман, навязваючы мімалётныя вобразы жыцця, якія праз некалькі гадоў знікнуць. Нібы нашае жыццё – модныя тэндэнцыі, якімі трэба кіравацца і якія мяняюцца кожны сезон. Гэта не так. Рэчаіснасць павінна прымацца і перажывацца такой, якая ёсць. Нярэдка яна прымушае нас сутыкацца з сітуацыямі тэрміновай патрэбы. Менавіта таму сярод учынкаў міласэрнасці знаходзім заклікі накарміць галодных і напаіць сасмаглых”, - дадаў Святы Айцец.
Шматлікія дабрачынныя акцыі і ахвяраванні, вядома, з’яўляюцца важнымі праявамі міласэрнасці, сцвердзіў Папа. “Аднак яны не закранаюць нас непасрэдна. Калі ж, праходзячы па дарозе, сустракаем чалавека ў патрэбе або калі бедны грукае ў дзверы нашага дома, гэта зусім іншае”, бо няма больш дыстанцыі паміж намі і асобамі ў патрэбе, патлумачыў Пантыфік.
“У гэтых выпадках якая мая рэакцыя? Пераводжу позірк і праходжу міма? Ці спыняюся, каб пацікавіцца, як ён сябе адчувае? І калі так робіш, абавязкова знойдзецца нехта, хто скажа: “Аднак ён вар’ят, каб размаўляць з бедным!”. Гляджу, ці магу нейкім чынам прытуліць гэтага чалавека ці імкнуся як мага хутчэй яго пазбавіцца? Але, можа, гэты бядняк просіць толькі самага неабходнага: нечага паесць і папіць. Задумаемся на хвіліну, колькі разоў прамаўляем “Ойча наш”, не надаючы, аднак, сапраўднай увагі словам ‘Хлеба нашага штодзённага дай нам сёння’!” – сказаў Папа.
Голад – вельмі складанае выпрабаванне, якое, тым не менш, “паўтараецца штодня і суіснуе побач з дастаткам і марнатраўствам”, адзначыў Пантыфік. “Заўсёды актуальнымі з’яўляюцца словы апостала Якуба: “Якая карысць, браты мае, калі нехта кажа, што мае веру, а ўчынкаў не мае? Ці можа вера збавіць яго? Калі брат ці сястра знаходзяцца ў галечы, не маючы штодзённай ежы, а нехта з вас скажа ім: “Ідзіце ў спакоі, грэйцеся і насычайцеся”, але не дасць ім неабходнага для цела, то якая з гэтага карысць? Так і вера без учынкаў мёртвая сама па сабе” (Якуб 2, 14-17). Заўсёды ёсць нехта галодны ці прагнучы, які патрабуе мяне. Не магу даручыць гэта іншаму. Гэты бядняк патрабуе мяне, маёй дапамогі, майго слова, майго клопату. Усе мы маем да гэтага дачыненне”, - падкрэсліў Святы Айцец.
У працяг Пантыфік нагадаў іншую добра вядомую прыпавесць – пра памнажэнне хлябоў. “Гэта вельмі важны для нас урок”, які навучае, што з таго нешматлікага, што маем, атрымаем незлічонае багацце, калі аддадзём яго ў рукі Езуса і падзелім з верай, патлумачыў Францішак.
Святы Айцец прывёў словы з энцыклікі Бэнэдыкта XVI “Caritas in veritate”, якія сцвярджаюць, што “даць хлеб галодным (пар. Мц 25, 35. 37. 42) – гэта этычны імператыў для паўсюднага Касцёла”. “Трэба, каб сталела салідарная свядомасць, якая лічыць харчаванне i доступ да вады паўсюдным правам усіх людскіх істот, якое не дапускае адрозненняў ці дыскрымінацыі”, - працытаваў Францішак свайго папярэдніка.
“Не будзем жа забываць словы Езуса ‘Я - хлеб жыцця’ (Ян 6,35) і ‘Калі хто прагне, няхай прыйдзе да Мяне і п’е’ (Ян 7,37)”, - заклікаў Папа і дадаў, што для ўсіх вернікаў яны з’яўляюцца выклікам, каб прызнаць, што, даючы есці галоднаму і піць сасмагламу, мы будуем нашы адносіны з Богам.
All the contents on this site are copyrighted ©. |