«Հայոց Ցեղասպանութեան 100-րդ տարելից» յուշադրամը «Տարուայ Յուշադրամը» ընտրուած է

Մոսկուայի մէջ տեղի ունեցած «Դրամներու համաստեղութիւն­-2016» միջազգային տասներորդ յոբելեանական մրցոյթին Հայաստանի կեդրոնական դրամատան կողմէ 2015 թուականին թողարկուած «Հայոց ցեղասպանութեան 100-­րդ տարելից» արծաթէ յուշադրամը «Տարուայ յուշադրամը» անուանակարգին մէջ առաջին տեղը գրաւած է: Այս մասին «Արմենփրես»-­ին կը տեղեկացնէ ԿԴ հասարակայնութեան հետ կապերու ծառայութիւնը:

 Մրցոյթին ներկայացուած էր աւելի քան 240 յուշադրամ եւ 21 հաւաքածու: Մրցոյթի յաղթողները որոշած է դատակազմը, որուն մէջ էին փորձագէտներ համաշխարհային յայտնի թանգարաններէ եւ աճուրդի տուներէ, կեդրոնական դրամատուներէ, յուշադրամներ մատակարարող ընկերութիւններէ, դրամագիտական ընկերութիւններէ եւ մասնագիտացուած հրատարակչութիւններէ:

 «Դրամներու համաստեղութիւն» յուշադրամներու միջազգային մրցոյթը կ՛իրականացուի 2007 թուականէն: 2016-ին մրցոյթին մասնակցած են 44 կազմակերպութիւն 29 երկիր (կեդրոնական դրամատուներ, դրամահատարաններ, մատակարար ընկերութիւններ եւ այլն):

«Հայոց ցեղասպանութեան 100-­րդ տարելից» արծաթէ յուշադրամի արուեստագիտական չափանիշները

Անուանական արժէքը` 100 դրամ

 Մետաղը եւ հարգը` արծաթ 9250

 Տրամագիծը` 50,0 մմ

Ծանրութիւնը` 67,2 կ․

Որակը` սովորական (հնաձեւ)

 Դրամաշուրթը` հարթ

Տպաքանակը` 1000 հատ

 Յուշադրամի էսքիզներու հեղինակներն են Սուրէն Սիմոնեանը եւ Արամ Ուռուտեանը: Հատուած է Լիթվիայի դրամահատարանին մէջ:

 Դիմերես` Հայոց ցեղասպանութեան զոհերու յիշատակը յաւերժացնող յուշակոթողներ (աջէն ձախ). սգաւոր մօր յուշարձան (Իժեւսկ, ՌԴ, 2010 թ., հեղինակ` Թ. Աբրամիձէ), երգահան Կոմիտասին նուիրուած յուշարձան (Փարիզ, Ֆրանսա, 2003 թ., հեղինակ` Դ. Երեւանցի), խաչքար­յուշարձան (Մայր Աթոռ Սուրբ Էջմիածին, Հայաստան, 1965 թ., հեղինակ` Ռ. Իսրայէլեան), յուշասիւն­խաչքար (Կլանտէյլ, ԱՄՆ, 2000 թ., հեղինակ` Ք. Քարիբեան): Ներքեւը` Ծիծեռնակաբերդի յուշահամալիր (Երեւան, Հայաստան, 1967 թ., հեղինակներ` Ա. Թարխանեան, Ս. Քալաշեան):

Դարձերես` Հայոց ցեղասպանութեան զոհերու յիշատակը յաւերժացնող յուշակոթողներ (աջէն ձախ). յուշարձան` հայ հայդուկներուն (Ուջան, Հայաստան, 1989 թ., հեղինակ` Իւ. Մինասեան), յուշակոթողի մէկ հատուած արծիւի տեսքով (Հալէպ, Սուրիա, 1990 թ., հեղինակներ` Վ. Պերթիզեան, Գ. Երամեան), յուշատախտակի մէկ հատուած` կնոջ քանդակ (Սան Փաուլու, Պրազիլ, 1966 թ., հեղինակ` Խոսէ Հերեզ Ռեկալտէ), խաչքար (Անտուերպեն, Պելճիքա, 2003 թ., հեղինակ` Հ. Սոֆոյեան): Ներքեւը` Ծիծեռնակաբերդի յուշահամալիր:

Քաղուած Եռագոյնէն