Lufta sot është “kudo”: bota, pra, t’i lutët Zotit e “bashkuar” për paqen. Kështu
tha Papa Françesku në mbarim të lutjes së mesditës të Engjëllit të Tënzot në Sheshin
e Shën Pjetrit në Vatikan. Ati i Shenjtë Françesku, duke komentuar pjesën e Ungjillit
të kësaj së diele, u kërkoi besimtarëve të jetojnë sipas logjikës së Ungjillit, duke
zgjedhur udhën e drejtë që na tregon Jezusi e duke mos ndjekur logjikën e një “korrupsioni
të përhapur”. Së fundit kujtoi mbylljen e Kongresit Eukaristik italian në Gjenovë
dhe Baetifikimin dje në Sardenjë të Elizabetta Sanna.
Ja fjalët e Papës Françeskut gjatë lutjes së Engjëllit të Tënzot
Sot Jezusi na sjell të reflektojmë mbi dy stile të kundërta të jetës : atë mondan
e atë të Ungjillit. Dhe këtë e bën përmes tregimit të shëmbëlltyrës së mbarështuesit
- administratorit të pandershëm e të korruptuar, të cilin Jezusi e lavdëron, megjithëse
ishte i pandershëm (krh Lk 16,1-13). Duhet të saktësojmë menjëherë se ky mbarështues
nuk paraqitet si shembull për t’u ndjekur, por si shembull i shkathtësisë (dinakërisë).
Ky njeri akuzohej për mbarështimin e keq të të mirave dhe të punëve të zotërisë të
vet e, para se të largohej, mundohej me shkathtësi t’i bënte për vete borxhlitë, duke
ua falur borxhin atyre për të siguruar kështu një të ardhme. Duke komentuar këtë sjellje,
Jezusi vëren: “Bijtë e kësaj bote, janë më të kujdesshëm në marrëdhënie të shoqishoshme
se bijtë e dritës” (rr. 8).
Para një shkathtësie të tillë mondane ne jemi të thirrur të përgjigjemi me shkathtësinë
e krishterë, që është dhuratë e Shpirtit Shenjt. Është fjala për t’u larguar nga shpirti
e për t’u shkëputur nga vlerat e botës, që kaq shumë i pëlqejnë djallit, për të jetuar
sipas Ungjillit. Mondaniteti shfaqet me sjelljet e veprat e korrupsionit, të mashtrimit,
të nëpërkëmbjes, e përbënë udhën më të gabuar, udhën e mëkatit, megjithëse është ajo
më komode për t’u përshkuar. Ndërsa shpirti i Ungjillit kërkon një stilin e jetës
serioze e impenjuese, që ka në vete ndershmërinë, korrektësinë, respektin ndaj të
tjerëve e ndaj dinjitetit të tyre, ndjenjën e detyrës. Kjo është shkathtësia e krishterë!
Udha e jetës sjell në zgjedhjen dhe përcaktimin tonë ndërmjet dy udhëve: ndërmjet
ndershmërisë e pandershmërisë, ndërmjet besnikërisë e pabesnikërisë, ndërmjet egoizmit
e altruizmit, ndërmjet së mirës e së keqes. Nuk mund të luhatemi ndërmjet njërës e
tjetrës, sepse lëvizin sipas logjikëve të ndryshme e të kundërta. Eshtë më rëndësi
të vendosim se të cilin drejtim duhet të marrim e pastaj, pasi të kemi zgjedhur udhën
e drejtë, të ecim me zell e vendosmëri, duke u mbështetur në hirin e Zotit e në mbështetjen
e Shpirtit të tij. Përfundimi i fragmenti të sotëm ungjillor është i fortë e kategorik:
“Asnjë shërbëtor nuk mund t’u shërbejë njëkohësisht dy zotërinjve, sepse ose do ta
urrejë njërin e tjetrin do ta dojë, ose pas njërit do të shkojë e tjetrin do ta përbuzë”
(rr.13).
Jezusi sot na këshillon e nxit të zgjedhim e të përcaktohemi në mënyrë të qartë ndërmjet
Tij e shpirtit të botës, ndërmjet logjikës së korrupsionit e lakmisë dhe asaj të ndershmërisë
e bujarisë, ndarjes bashkë me të tjerët. Mos të harrojmë edhe se korrupsioni prodhon
përshtatshmërinë, lind varfëri, shfrytëzim, vuajtje. Ndërsa përkundrazi, kur provojmë
të ndjekim logjikën ungjillore të integritetit, të qartësisë në synime e në sjellje,
të vëllazërimit, ne bëhemi artizanë të drejtësisë dhe hapim horizonte plotë shpresë
për njerëzimin. Në dhurimin falas të vetvetes për vëllezërit tanë, ne shërbejmë zotërinë
e drejtë: Zotin.
Virgjëra Mari na ndihmoftë të zgjedhim në çdo rast e me çdo kusht udhën e drejtë,
duke gjetur edhe guximin për të shkuar kundër rrymës së mondanitetit, vetëm e vetëm
për të ndjekur Jezusin e Ungjillin e tij.
All the contents on this site are copyrighted ©. |