Святы Айцец удзяліў сакрамэнт канфірмацыі цяжка хвораму шаснаццацігадоваму юнаку Джузэпэ Кьёла. Цырымонія прайшла перад агульнай аўдыенцыяй, якую 10 верасня 2016 г. Францішак праводзіў на галоўнай ватыканскай плошчы ў рамках Юбілею Міласэрнасці.
Джузэпэ Кьёла нарадзіўся на Сіцыліі. Лячэнне ён праходзіць у анкалагічным аддзяленні фларэнтыйскага ўніверсітэцкага шпіталя “Meyer”. У Ватыкан юнак быў дастаўлены на машыне хуткай дапамогі, паведамляе ватыканская газета “L’Osservatore Romano”.
Гэта стала магчыма пасля таго, як некалькі дзён таму ён напісаў ліст Францішку, у якім распавёў пра сваё гарачае жаданне сустрэцца з ім. Адказ не прымусіў доўга сябе чакаць: Джузэпэ Кьёла адразу атрымаў запрашэнне прыбыць у Ватыкан.
Пры сустрэчы Святы Айцец цёпла абняў яго. Падчас удзялення сакрамэнту юнак сядзеў у інвалідным вазку. Яго суправаджалі бацькі, некаторыя сваякі, капелан шпіталя “Meyer”, намеснік кіраўніка фларэнтыйскага “Caritas”, некалькі валанцёраў, а таксама арцыбіскуп Рына Фізікела, старшыня Папскай рады па новай евангелізацыі. Пасля цырымоніі Папа падарыў яму ружанец і папрасіў не забываць маліцца за яго.
All the contents on this site are copyrighted ©. |