«Մայր Թէրէզա… քիչերուն յայտնի է, որ մարդկութեան այս հազուագիւտ ծաղիկը կրած է Ակնեսա Պոյաճեան անունը, այսինքն` եղած է հայուհի (այդ մասին 88-ի երկրաշարժէն յետոյ գալով Հայաստան` ինք Վազգէն Ա-ին պատմած է, ինքս այս մասին լսած եմ Արցախի թեմի առաջնորդ Պարգեւ արքեպիսկոպոս Մարտիրոսեանէն): Հրաչուհի Փալանտուզեանի այս գրառումը տարածուած էր համացանցին վրայ:
«Հայերն այսօրը» ճշտեց Պարգեւ Սրբազանէն: Արցախի թեմի առաջնորդը հաստատեց լուրի ճշմարտացիութիւնը եւ ըսաւ, որ Վազգէն Առաջին այն յայտնած է Մայր Թէրէզայի հետ հանդիպումէն յետոյ. «1988 թուականի Սպիտակի երկրաշարժէն յետոյ, երբ Մայր Թէրէզան ժամանած էր Հայաստան, հանդիպում ունեցած նաեւ Վազգէն Առաջինի հետ: Հանդիպման ընթացքին Մայր Թէրէզան կաթողիկոսին պատմած է իր հայկական ծագման մասին: Անոր իսկական ազգանունը Պոյաճեան է, հայրը Արեւմտեան Հայաստանէն գաղթած է Ալպանիա, մայրն ալ ալպանուհի քրիստոնեայ է: Իսկ հանդիպումէն անմիջապէս յետոյ, երբ 20-25 միաբաններով հաւաքուած էինք, Վազգէն Առաջին, որուն լուրը ոչ միայն ուրախացուցած էր, այլ նաեւ զարմացուցած, այդ մասին պատմեց մեզի»:
Աւելցնենք, որ Մայր Թէրէզա Կալկաթացի իսկական անունը Ակնէս Կոնճա Պոյաճիու է, ալպաներէն` Agneze Gonxhe Bojaxhiu: 1931 թուականին իր կամքով կուսակրօնութեան ուխտ ընդունելով` 21 տարեկանին կրած է Թէրէզա անունը` ի պատիւ 1927 թուականին սուրբերու շաքը դասուած ֆրանսուհի միանձնուհի Թէրէզայի (Թէրէզա Լիզյէցի), որ յայտնի էր իր բարութեամբ եւ գթասրտութեամբ:
Մայր Թէրէզան Խաղաղութեան Նոպելեան մրցանակի դափնեկիր է (1979): Կաթոլիկ եկեղեցին դասած է երանելիներու շարքը: Մահացած է Կալկաթայի մէջ, 1997թ. Սեպտեմբեր 5-ին, 87 տարեկան հասակին:
All the contents on this site are copyrighted ©. |