«Պի.Պի.Սի.» կը հաղորդէ, որ ովկիանոսներու տաքնալուն պատճառով կը տարածուին այնպիսի հիւանդութիւններ, որոնք կրնան սպառնալիք ներկայացնել անասուններու եւ մարդոց համար: 12 երկիրներէ 80 գիտնականներ այս եզրակացութեան եկած են ուսումնասիրութեան մը մէջ, որ կատարուած է Բնութեան պահպանութեան եւ բնական պաշարներու միջազգային միութեան ծիրին մէջ:
Գիտնականներու եզրակացութեան համաձայն, ովկիանոսները 1970-ական թուականներէն ի վեր կլանած են մոլորակի ջերմաստիճանի ընդհանուր աճին 93 առ հարիւրը: Ովկիանոսները դարձած են համաշխարհային ջերմացումին դէմ իւրատեսակ վահան: Սակայն ատիկա ամբողջովին փոխած է ովկիանոսի կեանքի համակարգը:
Այդ հոլովոյթներուն պատճառով, օրինակ, կը փոխուին ձկնորսութեան աւանդական վայրերը, ինչ որ կը սպառնայ աշխարհի պարենային անվտանգութեան: Կը մոլորին նաեւ անասունները, օրինակ, կէտերը կամ թռչունները չեն կրնար կերակուր գտնել աւանդական վայրերու մէջ:
Գիտնականները կը նախազգուշացնեն, որ ատոր հետեւանքներէն մէկն ալ այն է, որ արեւադարձային տարբեր հիւանդութիւնները կը տարածուին նոր շրջաններու մէջ:
Գիտնականները վստահ են, որ նոյնիսկ եթէ մարդկութիւնը կարենայ ձերբազատիլ ջերմոցային կազերու աճէն, համաշխարհային ովկիանոսի փոփոխման հոլովոյթը պիտի շարունակուի:
Գիտնականները իրենց զեկուցումին մէջ ովկիանոսներու ջերմաստիճանի բարձրացումը կ՛անուանեն «մեր սերունդի ամէնէն գլխաւոր գաղտնի մարտահրաւէրը»:
All the contents on this site are copyrighted ©. |