“Të shumta, shpresat dhe pritjet për një stinë të re në marrëdhëniet ndërmjet Selisë së Shenjtë dhe Kinës, në dobi të paqes botërore”. Kështu, thënë përmbledhtas, shprehet sekretari i Shtetit të Vatikanit, kardinali Pietro Parolin, duke folur, në Pordenone, për temën “ura” e krijuar nga kardinali Celso Costantini. Prelati i lartë kujtoi angazhimin e palodhur të Kardinalit Celsi në favor të dialogut ndërmjet Kishës e Kinës dhe shprehu dëshirën që të shkruhet një faqe e panjohur e historisë, me besim në Provaninë Hyjnore e me realizëm të plotë, në shërbim të së mirës.
Marrëdhënie të reja në favor të paqes botërore
Marrëdhëniet e reja, të dëshiruara, me Kinën, nuk janë qëllim në vetvete, e as dëshirë për kushedi çfarë suksesesh “sipas mendësisë së botës”. Këto marrëdhënie u menduan e u ndoqën, jo pa frikë e ankth, vetëm sepse janë në shërbim të së mirës së katolikëve kinezë, të mbarë popullit kinez dhe të harmonisë së mbarë shoqërisë. Janë në favor të paqes botërore. Nga Pordenone, dioqezë e kardinalit Celso Costantini, delegat i parë apostolik në Kinë nga vitet 1922-1933 dhe ndërtues i vërtetë urash, sekretari i Shtetit të Vatikanit, kardinali Parolin, foli plot me shpresë për një stinë të re në marrëdhëniet Seli e Shenjtë - Kinë.
Papa e njeh martirizmin e katolikëve në Kinë, por edhe dëshirën për bashkim të plotë
E gjithë kjo - shpjegon - do të jetë në dobi të bashkëjetesës së frytshme paqësore ndërmjet popujve e Kombeve, në një botë si jona, të tronditur thellë nga një mori tensionesh e konfliktesh. Papa Françesku - vijon - ashtu si paraardhësit e tij, i njeh mirë vuajtjet, keqkuptimet, martirizimin e mbuluar shpesh me heshtje, që rëndon mbi shpatullat e bashkësisë katolike në Kinë. Por njeh edhe dëshirën për bashkim të plotë me Pasardhësin e Shën Pjetrit, progresin e arritur e inkurajon, në Jubileun e Mëshirës, faljen reciproke dhe pajtimin.
All the contents on this site are copyrighted ©. |