Ֆրանչիսկոս Պապին Ասսիզի այցելութեան յայտագիրը։

(Ռատիօ Վատիկան) Յառաջիկայ 4 օգոստոս 2016-ի յետմիջօրէին, Ֆրանչիսկոս Սրբազան Քահանայապետը­ ուխտագնացութիւն պիտի կատարէ Ասսիզացիի Սուրբ Ֆրանչիսկոսի Սրբավայր` այցելելով նոյնինքն Սուրբ Ֆրանչիսկոսի վերանորոգած փոքրիկ մատուռը (Փորցիունքոլան) որ այսօր կը գտնուի Սանթա Մարիա Տէյլի Անճելի մայր տաճարին ներքոյ եւ վայր է ուխտագնացութեան։

Նորին Սրբութիւնը վերոնշեալ այցելութիւնը կը կատարէ  Ասսիզիի ներումի 800-րդ տարեդարձին առթիւ։

Սրբազան Քահանայապետին Ասսիզի ժամանումը նախատեսուած է 15.40-ին, ուղղաթիռով։

Նորին Սրբութիւնը կը դիմաւրեն Ասսիզի Նոչերա Ումպրա - Կուալտօ Թատինօ թեմին առաջնորդ գերապայծառ Տոմենիքօ Սորրենթինոն ընկերակցութեամբ Ումպրիա Մարզի նախագահին, Փերուճիա քաղաքի ոստիկանապետին եւ Ասսիզիի քաղաքապետին։

Նորին Սրբութիւնը ապա կ՛ուղղուի Սանթա Մարիա Տէյլի Անճելի պազիլիքա որուն մուտքին կը դիմաւորուի Ֆրանչիսկեան Փոքրիկ Եղբայրներու միաբանութեան ընդհանուր մեծաւոր` Հայր Միքայել Անթոնի Փերրի կողմէ, Միաբանութեան Ումպրիա մարզի տեղակալ` հայր Քլաուտիօ Տուրիկեթթոյի եւ ''Փորցիունքոլայի'' պահակ` Հայր Ռոզարիօ Կուլիոթթայի ընկերակցութեամբ։

Ֆրանչիսկոս Պապը մուտք կը գործէ Պազիլիքա եւ կ՛ուղղուի այնտեղ պահպանուած վերոնշեալ փոքրիկ մատուռը ու աղօթքի մէջ պահ մը ամփոփուելէ ետք խորհրդածութիւն մը կը ներկայացնէ հիմնուած Մատթէոսի` 18 գլուխ 21-35 համարներուն վրայ, որուն մէջ Պետրոս հարց կու տայ Յիսուսին թէ ''Քանի անգամ հարկ է ներել եղբօր մը որ իր դէմ կը մեղանչէ''։

Խորհրդածութեան աւարտին Ֆրանչիսկոս Պապ կ՛ողջունէ ներկայ գտնուող եպիսկոպոսներն ու կղերական դասը եւ կ՛ուղղուի Ֆրանչիսկեան Միաբանութեան Վանքի բուժարան ուր հանդիպում կ՛ունենայ այնտեղ խնամուած կրօնաւորներուն հետ ինչպէս նաեւ բուժարանի անձնակազմին հետ։ Սրբազան Քահանայապետը ապա դուրս գալով Վանքէն, Պազիլիքայի մուտքին կ՛ողջունէ հրապարակը համախմբուած հաւատացեալները ապա կ՛ուղղուի ''Միկակելլի'' մարզադաշտ որտեղէն ուղղաթիռով կը մեկնի` վերադարձ կատարելով Վատիկան։