Լեհաստանի մէջ վերջին հրաժեշտ Գերապայծառ Զիկմունդ Զմովսքիի։

(Ռատիօ Վատիկան) Երեքշաբթի 19 Յուլիս 2016-ին Լեհաստանի Ռատոմ քաղաքին մէջ տեղի կ՛ունենայ`  Քահանայապետական  առողջապահութեան հովուութեան խորհուրդին նախագահ ՝Գերապայծառ Զիկմունթ Զիմովսքիի թաղման կարգը։ Յայտնենք թէ գերապայծառ Զիմովսքի իր մահկանացուն կնքած էր անցեալ 13 Յուլիսին երկար հիւանդութենէ մը ետք։

Ան ծնած էր Լեհաստանի Քուփիենին քաղաքին մէջ ՝ 7 ապրիլ 1949-ին։ Քահանայ ձեռնադրուած է 25 ապրիլ 1973-ին։ 27 մարտ 2002-ին, նշանակուած է Լեհաստանի  Ռատոմ թեմի եպիսկոպոս՝ Սուրբ Յովհաննէս Պօղոս Բ քահանայապետի կողմէ, եւ նոյն տարուայ 25 մայիսին ստացած է եպիսկոպոսական օծումը։ ։

Հանգուցեալ եպիսկոպոսը` Ռատոմ թեմին մէջ ծառայած է մինչեւ 18 ապրիլ 2009,  երբ Պենետիկտոս ԺԶ վաստակաւոր քահանայապետը զինք անուանեց  Քահանայապետական առողջապահութեան խորհուրդին նախագահ, անոր շնորհելով Արքեպիսկոպոսի տիտղոսը։

Նշենք նաեւ թէ Հինգշաբթի 21 Յուլիսին 2016-ի երեկոյեան 6-ին Հռոմի Սասիայի Սուրբ Հոգւոյն անուամբ եկեղեցւոյ մէջ, Քահանայապետական  առողջապահութեան հովուութեան խորհուրդի նախաձեռնութեամբ կազմակերպուած է ննջեցեալին հոգւոյն համար հոգեհանգստեան սուրբ պատարագ։