Святы Пасад нагадаў аб прыродзе чалавечых правоў

Чалавечая годнасць, з якой вынікаюць яго правы, не “прывілегія”, якой можа надзяліць або пазбавіць дзяржава. Гэта праява каштоўнасці чалавека, якую дзяржаўныя ўлады павінны бараніць і ахоўваць, падкрэсліў арцыбіскуп Бернардзіта Ауса. Пастаянны назіральнік Апостальскай Сталіцы пры структурах ААН у Нью-Ёрку прыняў удзел у дыскусіі на вышэйшым узроўні на тэму правоў чалавека.

Дэбаты адносна абароны чалавечай годнасці і павагі да фундаментальных правоў чалавека ватыканскі дыпламат назваў вельмі своечасовымі. Мы становімся сведкамі таго, як мірнае насельніцтва пакутуе ад войнаў і канфліктаў, людзі ператвараюцца ў аб’екта продажу для паднявольнай працы, прастытуцыі і гандлю чалавечымі органамі, прадстаўнікі этнічных і рэлігійных меншасцяў падвяргаюцца пераследу і вынішчэнню, нагадаў ватыканскі дыпламат. Ён выказаў занепакоенасць існуючай сітуацыяй, калі людзі выкідаюцца грамадствам на ўзбочыну жыцця – гэтую несправядлівасць мае на ўвазе папа Францішак, калі гаворыць аб “культуры адчужэння”.

Арцыбіскуп Ауса адзначыў наяўнасць этычнага прагрэсу ў сучасным свеце, доказам якому служаць актыўныя дыскусіі і дыялог на тэму правоў чалавека. Не хапае, аднак, разумення крыніцы гэтых правоў, іх прыроды, дадаў іерарх. Годнасць – гэта праява каштоўнасці чалавека, якую дзяржаўныя ўлады павінны бараніць і ахоўваць, звярнуўся да ўдзельнікаў сустрэчы арцыбіскуп Ауса.

Нарэшце, іерарх перасцярог, што з’яўленне ў апошні час так званых “новых правоў” вядзе да страты дакладнага значэння паняцця “правы чалавека”. Таму неабходна пільнаваць канкрэтнае разуменне тэрміну, інакш грамадства стане выкарыстоўваць яго для задавальнення сваіх “часовых капрызаў”.