Спачуванні Францішка пасля тэракту ў Ніцы

У сувязі з тэрактам у Ніцы, здзейсненым увечары 14 ліпеня 2016 г., Святы Айцец пераказаў словы спачування праз кардынала Дзяржсакратара Пьетра Параліна.  

У тэлеграме на імя біскупа гэтага французскага горада Андрэ Марсо гаворыцца: “У час, калі Францыя адзначае сваё нацыянальнае свята, сляпы гвалт паразіў краіну ў Ніцы, выклікаўшы шматлікія ахвяры, у тым ліку сярод дзяцей”. Святы Айцец Францішак у чарговы раз асудзіў падобныя ўчынкі і выказаў глыбокі смутак і сваю духоўную блізкасць французскаму народу.

Папа даручыў Божай міласэрнасці ахвяр тэракту і запэўніў у сваёй лучнасці з сем’ямі загінулых, выказаў удзячнасць тым, хто прычыніўся да выратавання людзей.

“З малітвай аб міры і гармоніі, Францішак выпрошвае Божае благаслаўленне для сямей, якія прабываюць у жалобе, і для ўсіх жыхароў Францыі”, - напісана ў тэлеграме за подпісам бліжэйшага супрацоўніка Папы.

Увечары 14 ліпеня 2016 г. у Ніцы быў здзейснены тэракт. Грузавы аўтамабіль урэзаўся ў натоўп людзей, пасля чаго вадзіцель адкрыў агонь па прахожых. Па апошніх дадзеных, ахвярамі злачынства сталі 84 чалавека, яшчэ каля 200 атрымалі раненні. Сярод пацярпелых – не менш за 54 дзіцяці.