ֆրանչիսկոս Քահանայապետին աղօթքը ի սպաս Փախստականներուն։

(Ռատիօ Վատիկան) Երեք տարիներ առաջ` 8 յուլիս 2013-ին, Իտալիոյ Լամփետուզա կղզիի մարզադաշտի մէջ մատուցած ս. պատարագին աւարտին,  ֆրանչիսկոս Քահանայապետը աղօթք մը արտասանած էր Ս. Կոյս Մարիամի արձանին առջեւ հայցելով անոր հովանին գաղթականներուն համար։ Աղօթքին մէջ Քահանայապետը ապա Աստուծմէ ներում խնդրած էր անզգամ եսապաշտութեան ու մարդոց ցուցաբերած անտարբերութեան համար։
Ուրբաթ 8 յուլիսին կը նշուի Ֆրանչիսկոս Պապին Լամփետուզա  կատարած հովուական այցելութեան երրորդ տարեդարձը եւ այս առթիւ դարձեալ կը հրատարակենք  Նորին Սրբութեան աղօթքը։

Ով Մարիամ, Աստղ ծովու, անգամ մը եւս մեր հայեացքը ձեզի կ'ուղղենք ապաստան ու անդորրութիւն խնդրելու, պաշտպանութիւն եւ օգնութիւն պաղատելու։

Աստուծոյ Մայրը ու մեր Մայրը, ուղղէ' քու գողտրիկ հայեացքդ բոլոր անոնց որ ամէն օր կը դիմագրաւեն ծովու վտանգը իրենց ընտանիքին ապրուստը երաշխաւորելու, արարչագործութեան յարգանքը պաշտպանելու եւ ծառայելու խաղաղութեան հաստատումին` ժողովուրդներու միջեւ։

Գաղթականներու ու փախստականներու պաշտպան` քու մայրական հովանիիդ ներքեւ ընդունէ' այրերը, կիները ու մանուկները, որոնք իրենց երկրէն փախած են նոր ապագայ մը գտնելու յոյսով։ Անոնց հանդիպումը մեզի ու մեր ժողովուրդին հետ չդառնայ աւելի յոռի ստրկութիւն մը, նուաստացում մը։
Մայր գթութեան, մեզի համար խնդրէ ներում, մենք որ կոյր դարձած ենք մեր եսապաշտութեան, շահամոլութեան ու մեր վախերու հետեւանքով, ու անուշադիր` մեր եղբայրներու կարիքներուն ու տառապանքին։ 

Ապաստան մեղաւորաց, ընդունէ' սրտի դարձը անոնց, որոնք կը յարուցանեն պատերազմ, ատելութիւն ու թշուառութիւն, անոնց, որոնք կը շահագործեն իրենց եղբայրները ու կը կատարեն անվայել վաճառքը մարդկային կեանքերու։

Եղբայրօգնութեան օրինակ, օրհնէ' բարի կամք ունեցող այրերն ու կիները, որոնք կը հիւրընկալեն ու ձեռք կ'երկարեն իրենց դիմողներուն։ Թո'ղ անոնց ստացած ու տուած սէրը դառնայ սերմ եղբայրական նոր կապերու ու արեգակ` խաղաղութեան նոր աշխարհի մը։ Ամէն