Ֆրանչիսկոս Պապ Հռոմի ՄԱԿ-ի պարէնի համաշխարհային ծրագրի կեդրոնատեղիին մէջ։

(Ռատիօ Վատիկան) Երկուշաբթի, 13 յունիս 2016-ին, Ֆրանչիսկոս Սրբազան Պապը՝ հանդիսացաւ առաջին քահանայապետը որ այցելեց Հռոմի մէջ գտնուող ՄԱԿ-պարէնի համաշխարհային ծրագրի կեդրոնատեղին։ Սոյն այցելութիւնը զուգադիպեցաւ կայուն զարգացման հիմնական նպատակներու առնչուող աշխատանքներու հաւաքին։

 Նշենք թէ ՄԱԿ-ի Պարէնի համաշխարհային ծրագիրը, առաջին անգամուայ համար պարէնական օժանդակութիւն փոխանցած է Դամասկոսի Տարայյա շրջանին՝ 2012-ին, համագործակցութեամբ Արաբ-Սուրիական կիսալուսին մարդասիրական կազմակերպութեան։

ՄՊՀԾ, Սուրիոյ մէջ բաշխած է մէկ ամսուայ բաւարար սննդամթերք՝ 2400 անձերու, եւ մէկ ամսուայ համար ալիւր՝ 4000 անձերու։

Անցեալ հինգշաբթի օր՝ Դամասկոս Տարայյա շրջան հասած են 9 փոխադրակառքեր որոնք բեռցուցած էին նաեւ առողջապահական առարկաներ եւ դեղորայք։

ՄՊՀԾ յայտագիրին մէջ նախատեսուած է պարէնական օժանդակութիւն հասցնել Սուրիոյ այլ 19 շրջաններու։

Միայն յունիս ամսուայ առաջին օրերուն, ՄԱԿ-ի համաշխարհային Պարէնի ծրագիրը պարէնական օգնութեամբ սատարած է աւելի քան 1.4 միլիոն անհատներու։

Անոնք խնամք տարած են նաեւ Սուրիոյ հարեւան երկիրներուն՝ Յորդանանի, Թուրքիոյ, Լիբանանի, Իրաքի, ինչպէս նաեւ Եգիպտոսի մէջ ապաստան գտած 1.5 միլիոն սուրիացի։