Անցեալ ուրբաթ, 3 յունիս 2016-ի առաւօտուն, Պիքֆայայի Սուրբ Աստուածածին վանքին մէջ, Արամ Ա. վեհափառ հայրապետը ընդունեց Միջին Արեւելքի Քրիստոնեայ համայնքներու համախմբումի վարչութիւնը` գլխաւորութեամբ Մազլում արքեպիսկոպոսին: Սոյն համախմբումին մաս կը կազմեն Միջին Արեւելքի բոլոր քրիստոնեայ համայնքներու կրօնական եւ աշխարհական ներկայացուցիչները: Համախմբումը նպատակ ունի ամրապնդել համայնքներուն միջեւ գործակցութիւնն ու պաշտպանել քրիստոնեայ համայնքներու իրաւունքները: Սոյն համախմբումին մէջ Մեծի Տանն Կիլիկիոյ կաթողիկոսութեան ներկայացուցիչներն են Յուսիկ Ծ. վրդ. Մարտիրոսեան եւ դոկտ. Ժան Սալմանեան:
Վարչութիւնը տեղեակ պահեց վեհափառ հայրապետը վերջին շրջանին համախմբումին տարած աշխատանքներուն եւ մշակած ծրագիրներուն մասին: Վարչութիւնը նաեւ ուզեց լսել վեհափառ հայրապետին` ՄԱԿ-ի ներկայացուցիչներուն հետ ունեցած երկու հանդիպումներուն մանրամասնութիւնները:
Արամ Ա. կաթողիկոս ընդգծեց, որ բոլոր մակարդակներուն վրայ ունեցած իր հանդիպումներուն կիզակէտն է Միջին Արեւելքի մէջ քրիստոնեաներու ներկայութեան կարեւորութիւնն ու քրիստոնեայ համայնքներուն ապահովութիւնը, շրջանին մէջ խաղաղութիւնը եւ ծայրայեղականութեան վտանգը: Վեհափառ հայրապետը գնահատեց համախմբումին տարած աշխատանքները եւ քաջալերեց, որ անիկա աւելի կազմակերպ ու ծրագրաւորուած կերպով շարունակէ իր գործունէութիւնը:
All the contents on this site are copyrighted ©. |