Սուրբ Յովհաննէս ԻԳ-րդ երջանկայիշատակ քահանայապետին մահուան 53-րդ ամեակը

(Ռատիօ Վատիկան) Ուրբաթ 3 յունիս 2016-ին կը նշուի Սուրբ Յովհաննէս ԻԳ մահուան 53-րդ տարեդարձը։  Յովհաննէս Իգ –րդ Սրբազան Քահանայապետը` աւազանի անունով Անճելօ Ճուզեփփէ Ռոնքալլի ծնած էր 25 Նոյեմբեր 1881-ին Իտալիոյ Պէրկամօ քաղաքի` Սոթթօ Իլ Մոնթէ գիւղաքաղաքին  մէջ։ 28 Հոկտեմբեր 1958 ին ընտրուած է Տիեզերական Եկեղեցւոյ 261 –րդ Քահանայապետ` յաջորդելով Պիոս ԺԲ քահանայապետին։ 
Երջանկայիշատակ Յովհաննէս ԻԳ հաւատացեալներէն շատ սիրուած քահանայապետ մըն էր, ու Անոր մտահոգութիւնը եղած է Հովուական բնոյթ տալ իր Քահանայապետութեան, բազմապատկելով հաւատացեալներուն հետ իր յարաբերութիւնները, այցելութիւններ կատարելով ժողովրդապետութիւններուն, հիւանդանոցներուն եւ բանտերուն։
Յովհաննէս Իգ քահանայապետին ամենամեծ ներդրումը անկասկած եղաւ ''Վատիկանեան Տիեզերական Երկրորդ ժողովի'' գումարումը, որուն յայտարարութիւնը կատարեց սուրբ Պօղոսի տաճարին մէջ 25 ապրիլ 1959 թուականին. 
Յովհաննէս ԻԳ Քահանայապետը մեծ յանձնառումով գործեց ի սպաս աշխարհի խաղաղութեան։
1961ին հրատարակեց ''Mater et Magistra'' կոնդակը եւ 1963 ին ''Pacem in Terris'' շրջաբերականը։ 1963-ի գարնան` Յովհաննէս ԻԳ ստացաւ ''Պալզան'' Խաղութեան մրցանակը եւ նոյն տարուայ 3 Յունիսի երեկոյեան, հոգին աւանդեց առ հայր։
3 սեպտեմբեր 2000-ին, Յովհաննէս Պօղոս Բ քահանայապետի օրով հռչակուեցաւ երանելի ապա 27 ապրիլ 2014-ին  Յովհաննէս Պօղոս Բ Քահանայապետին հետ դասուեցաւ տիեզերական եկեղեցւոյ սուրբերու շարքին։