Прэзідэнт Коста-Рыкі наведаў Ватыкан

27 мая 2016 г. папа Францішак прыняў на аўдыенцыі ў Ватыкане Прэзідэнта Рэспублікі Коста-Рыка Луіса Гільерма Соліса Рыверу. Палітык затым сустрэўся з кардыналам Дзяржсакратаром Пьетра Паралінам, якога суправаджаў сакратар па адносінах Апостальскай Сталіцы з дзяржавамі арцыбіскуп Пол Галахер.

Падчас сардэчных размоваў падкрэсліваліся добрыя адносіны паміж Святым Пасадам і Коста-Рыкай і быў высока ацэнены ўнёсак, які Касцёл робіць, асабліва ў сферы адукацыі, аховы здароўя, спрыяння чалавечым і духоўным каштоўнасцям і ў сферы дабрачыннай дзейнасці. 

Суразмоўцы абмеркавалі таксама некаторыя тэмы, якія ўяўляюць агульную цікавасць, сярод якіх абарона чалавечага жыцця, а таксама такія асабліва актуальныя праблемы, як міграцыя і наркатрафік. Увага звярталася, між іншым, на рэгіянальную сітуацыю і некаторыя міжнародныя пытанні.