Ռայի Պատրիարքը վերադարձաւ Պէյրութ
Աւարտելէ ետք Փարիզ կատարած իր այցելութիւնը` մարոնի համայնքի Պշարա Ռայի պատրիարքը չորեքշաբթի, 11 մայիսին՝ կէսօրէ ետք վերադարձաւ Պէյրութ:
Ռայի պատրիարքը Փարիզի մէջ հանդիպումներ ունեցաւ Ֆրանսայի նախագահ Ֆրանսուա Հոլլանտի, Ծերակոյտի նախագահ Ժեռար Լարշէի, ինչպէս նաեւ ԵՈՒՆԵՍՔՕ-ի ընդհանուր տնօրէն Իրինա Պոքովայի հետ:
Ծերակոյտին մէջ Ռայի պատրիարքը զեկուցեց Արեւելքի քրիստոնեաներուն մասին:
Իր զեկուցումին մէջ ան նշեց, որ Միջին Արեւելքի ժողովուրդները միջազգային ընտանիքէն կը պահանջեն արդար եւ ամբողջական խաղաղութիւն ունենալու, ինչպէս նաեւ իրենց երկիրներուն մէջ կայունութիւնն ու բարգաւաճումը վայելելու իրենց իրաւունքը:
Ռայի պատրիարքը կտրականապէս մերժեց այն յայտարարութիւնները, թէ իսլամները կ՛ուզեն Արեւելքը պարպել քրիստոնեաներէն: «Իսլամները բացայայտօրէն կը յայտարարեն, թէ Արեւելքի մէջ քրիստոնեաներուն ներկայութիւնը կարեւոր է: Այս շրջագիծին մէջ ան կոչ ուղղեց զատորոշելու ահաբեկչական շարժումներուն եւ իսլամներուն միջեւ:
Անդրադառնալով Լիբանանի կացութեան` Ռայի պատրիարքը հաստատեց, որ Լիբանան կարիքը ունի պահպանելու իր ժողովրդավարութիւնն ու արժէքները, ինչպէս նաեւ իր ազգային, քաղաքական, ընկերային եւ մշակութային կեանքը:
| All the contents on this site are copyrighted ©. |