Është risimi teknologjik, fusha në të cilën do të bashkëpunojnë Sekretaria për Komunikimin dhe HD Forum Italia (HDFI). Për ta shpjeguar këtë marrëveshje, sot paradite u mbajt, në Vatikan, një konferencë shtypi, në të cilën morën pjesë, ndërmjet tjerësh, prefekti i Sekretarisë vatikanase për Komunikimin, imzot Dario Edoardo Viganò; drejtori i Qendrës Televizive të Vatikanit, Stefano D’Agostini si dhe presidenti i HD Forum Italia, Benito Manlio Mari.
Standartet teknologjike inovative, ndërmjet të cilave, formatet në Ultra HD-HDR, janë mjete të domosdoshme për të prodhuar audiovizivë cilësorë, me pasuri më të madhe hollësirash e ngjyrash, por njëkohësiht, edhe hapa vendimtare për ta shoqëruar reformën e mjeteve vatikanase të komunikimit. Në kuadrin e kësaj reforme – kujtoi imzot Viganò – përkimi teknologjik merr vlerë strategjike.
Komunikim e teknologji
Janë të ndryshme nismat, që burojnë nga ky takim i Sekretarisë së Komunikimit e HD Forum Italia, shoqatë, që synon të nxisë përdorimin e teknologjive të reja audiovizive: më 6 e 7 tetorin e ardhshëm, posaçërisht, parashikohet konferenca vjetore e HD Forum Italia, pranë Media Center Shën Piu X. Takimi, në të cilin do të marrin pjesë përsonalitete të njohura të bashkësisë tekonologjike botërore, titullohet: “Në kalim: komunikime e teknologji përtej kufijve”.
Filmato in ultra HD-HDR: hapja e Portës Shenjte
Për të dëshmuar sesa rrugëzgjidhjet tekniko-shkencore janë në gjendje të përmirësojnë përvojën e vizionit, gjatë konferencës së shtypit, mbajtur në Filmotekën vatikanase, u paraqit reportazhi “Behind-the-scenes” (Mbrapa kuintave), promovuar nga Sekretaria për Komunikimin dhe HD Forum Italia, e prodhuar nga Qendra Televizive e Vatikanit. Filmimi, i xhiruar me standard të Ultra HD-HDR, tregon figura me një cilësi shumë të lartë teknike të ceremonisë së hapjes, më 8 dhjetorin e kaluar, të Portës Shenjte në Vatikan.
Rruga sapo është hapur. Vijimi do të sjellë rezultate edhe më të larta për të gjitha mjetet e komunikimit të Selisë së Shenjtë.
All the contents on this site are copyrighted ©. |