Imzot Viganò për mënyrën e komunikimit të Papës Françesku

Sot, e diela e festës së të Shëlbuemit, por edhe ajo e Zojës së Pompeit, Papa Françesku tha Lutjen e Mbretëreshës Qiellore në Vatikan, duke kujtuar edhe Ditën e 50-të Botërore të komunikimeve shoqërore. Mesazhi i tij për këtë ditë u bë i njohur më 24 janar. Tema e sivjetme “Komunikimi dhe mëshira: një takim i frytshëm”. Në mesazh, Ati i Shenjtë vë theksin në rëndësinë që ka dëgjimi i tjetrit, si premisë për komunikimin e vërtetë. Ndoshta, Papa dëshiron të na thotë se është humbur disi kjo vlerë, që presupozon heshtjen. I kërkuam një koment prefektit të Sekretarisë së Komunikimit, imzot Dario Edoardo Viganò:

Kjo është e qartë, sidomos në ndërhyrjet e tij të vazhdueshme kundër thashethemeve. E kundërta e dëgjimit do të ishte fjala bosh, që mbyllet në vetvete e madje, mund të arrijë deri në krim, nëse thashethemet, zhurmat, kthehen në kallëzim, shpifje. Prandaj, ky është aspekt qëndror në mesazhin e Papës. Jo rastësisht, kur Ati i Shenjtë flet për komunikim nënvizon se të komunikosh do të thotë të ndash e kjo kërkon dëgjimin, të cilin ai e konsideron një lloj martirizimi. Pra, për të dëgjuar, duhet të dalim nga vetvetja. Ja përse është interesante ç’thuhet në Librin e Dajles: “Hiqi sandalet, sepse toka ku shkel, është tokë, ku është i pranishëm Tjetri”, pra, Zoti. Kemi një bashkëveprim, që na kërkon të hyjnë në majë të gishtave në botën e tjetrit për të krijuar marrëdhënie me të.

Papa jo vetëm që vijon të shkruajë në faqen e Tëitterit, nisur nga Benedikti XVI, por ka hapur një faqe të re edhe në Instagram, rrjet tjetër shoqëror, ku postohen fotografi. Cili është kontributi, që jep Ati i Shenjtë në botën digjitale?

Besoj se na tërheq vëmendjen, duke na thënë se të jesh gjithnjë në lidhje me të tjerët është diçka e rëndësishme, e dobishme, por duhet të shoqërohet nga takimi i vërtetë. Sot, sidomos të rinjtë jetojnë natyrshëm online dhe offline, por ne të rriturit duhet t’i nxisim drejt takimit konkret me tjetrin. Kemi nevojë t’i japim teknologjisë më shumë humanitet.