12 Տարուայ մէջ Վրաստանի Հայ համայնքը նուազած է 1/3-ով

Վրաստանի բնակչութեան մարդահամարի արդիւնքներով, (տեղի չէ ունեցած Հարաւային Օսէթիոյ եւ Աբխազիոյ մէջ) որ իրականացուած է 2014-ին Վրաստանի Ազգային վիճակագրական ծառայութիւնը, երկրի բնակչութիւնը 3,7 միլիոն է: Ատիկա 15 տոկսով պակաս է 2002 թուականի մարդահամարի արդիւնքներէն, կը հաղորդէ panarmenian.net-ը:

Ըստ արդիւնքներուն, Վրաստանի բանկչութեան 86,8% վրացիներ են` 3,2 միլիոն, 6,3%-ը` ատրպէյճանցիներ` 233 հազար, 4,5%-ը հայեր` 168 հազար, 0,7%-ը` ռուսեր` 26,5 հազար:

Վերջին տարիներուն Վրաստանի մէջ նուազած է ոչ միայն բնակչութեան ընդհանուր քանակը, այլ նաեւ երկրին մէջ բնակող ազգային փոքրամասնութիւնները: 1989 թուականի մարդահամարին տուեալներով, հայերը Վրաստանի մէջ կը կազմէին բնակչութեան ընդհանուր թիւին (5,4 միլիոն) 8%-ը` 437 հազար եւ քանակով երկրորդ ազգութիւնն էին երկրին մէջ վրացիներէն ետք, իսկ ատրպէյճանցիները կը կազմէին 5,7%-ը` 307,5 հազար: 2002 թուականի մարդահամարին տուեալներով հայերը արդէն կը կազմէին բնակչութեան ընդհանուր թիւին 5,7%-ը`249 հազար, զիջելով երկրորդ տեղը ատրպէյճանցիներուն (6,5% – 284 հազար): Այդպիսով, 12 տարուայ մէջ հայերուն քանակը Վրաստանի մէջ կրճատուած է 81 հազարով կամ գրեթէ մէկ երրորդով, իսկ ատրպէյճանցիներունը` 51 հազարով` 18%-ով:

Ըստ 2014 թուականի մարդահամարին, Վրաստանի մէջ կը բնակին նաեւ օսեր` 14.4 հազար, եզիտիներ` 12 հազար, ուքրանացիներ` 6 հազար, յոյներ` 5,5 հազար, ասորիներ` 2,4 հազար եւ այլ ժողովուրդներու ներկայացուցիչներ:

2014-ի բնակչութեան մարդահամարը տեղի ունեցած է Նոյեմբեր 5-19: Մարդահամարը իրականացուած է Վրաստանի տարածքի 82%-ին մէջ: