Թաղման Կարգ Հոգելոյս Հ. Յովհաննէս Ծ. Վրդ. Սէֆէրեանի
Չորեքշաբթի 27 Ապրիլ 2016-ի առաւօտեան ժամը 11:00-ին, Զմմառու վանքի Մայր տաճարին
մէջ, կատարուեցաւ նորօք հանգուցեալ Հ. Յովհաննէս Ծ. Վրդ. Սէֆէրեանի յուղարկաւորութիւնն
ու թաղման կարգը: Վախճանեալ վարդապետին մարմինը նախօրօք զետեղուած էր եկեղեցւոյ կեդրոնը,
որուն շուրջ համախմբուեցան միաբան հայրերը: Թաղման կարգը գլխաւորեց Տանն Կիլիկիոյ Կաթողիկէ
Հայոց Ամենապատիւ Տէր Գրիգոր Պետրոս Ի. Կաթողիկոս-Պատրիարքը, մասնակցութեամբ Ֆրանսայի
Կաթողիկէ Հայոց Առաջնորդ՝ Հ. Յովհաննէս Եպս. Թէյրուզեանի, Գերապայծառ Եպիսկոպոսներու,
Առաջնորդներու, Պէյրութի Հայ Կաթողիկէ Թեմի Օգնական Եպիսկոպոս՝ Հ. Գէորգ Եպս. Ասատուրեանի,
Պատրիարքական Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վրդ. Մուրատեանի, Գերապատիւ
վարդապետներու, Զմմառու վանքի Վարչական Հայրերու, Արժանապատիւ Քահանաներու, Առաքինազարդ
Քոյրերու: Թաղման ներկայ գտնուեցան նաեւ Զմմառու գիւղերէն ժամանած մայրապետներ և քահանաներ,
ինչպէս նաեւ «Ս. Միքայէլ և Երանելի Մալոյեան» դպրեվանքի ուսանողներ և հանգուցեալ վարդապետին
հարազատներ: Հոգեւոր Տէրը համապատարգ մատուցանեց բոլոր ներկայ հոգեւոր հայրերուն հետ,
ի հանգիստ հանցուցեալին: Ամենապատիւ Հոգեւոր Տէրը իր քարոզին մէջ անդրադարձաւ Հ. Յովհաննէս
Ծ.Վրդ. Սէֆէրեանի քահանայական կեանքին, ըսելով. «Առաքինի վարդապետը իր քահանայական կեանքի
70 տարիներուն ընթացքին քսան և հինգ հազար սուրբ պատարագ մատուցած է մեծ ջերմեռանդութեամբ,
որուն համար ուզեցի պատարագով սկսիլ թաղման կարգը»: Հոգեւոր Տէրը աւելցուց թէ «հանգուցեալը
փոքր հասակէն սրբակեաց կեանք մը ապրած էր և իր շուրջիններուն բարի օրինակ հանդիսացած
էր: Այս օրերուն եթէ Հայ Կաթողիկէ Եկեղեցին անոր նման անձնուէր, հնազանդ քահանաներ ունենար,
մեր գաղութներուն իրավիճակը բոլորովին բարգաւաճ կը դառնար»: Պատարագէն ետք՝ սկսաւ թաղման
եկեղեցւոյ կարգը, որուն ընթացքին կարդացուեցան Մարգարէական ընթերցուածներ, առաքելական
թուղթեր և Աւետարանական հատուածներ: Որոնցմէ ետք՝ երգուեցաւ միաբան Հայրերու կողմէ «Ողջոյն
քեզ Ս. Եկեղեցի» շարականը, որուն ընթացքին միաբանները իրենց վերջին յարգանքի տուրքը տուին
հանգուցեալին: Այնուհետեւ Ամենապատիւ Հոգեւոր Տիրոջ առաջնորդութեամբ, միաբան Հայրերը
թափօրով ուղղուեցան միաբանական դամբարան, ուր ողբաձայն երգուեցաւ « Դարձ, անձն իմ, ի
հանգիստ քո, զի Տէր կոչեաց զքեզ» սաղմոսը և կատարուեցաւ գերեզամանակարգը, միաժամանակ
օրհնուեցաւ Տիրոջ ծառային՝ Հ. Յովհաննէսի հանգստեան հողը: Որմէ ետք աստուածային օրհնութեամբ
դագաղը գերեզմանին մէջ զետեղուեցաւ: Իսկոյն հնչեցին եկեղեցւոյ սգոյ զանգերը, մինչ վարդապետները
կ'երգէին «Փառք ի բարձունս Աստուծոյ»:
Հանգուցեալ Հ. Յովհաննէսի թաղման կարգէն ետք, ներկաները ուղուեցան Զմմառու վանքի մայր
դահլիճ, ուր տեղի ունեցաւ ցաւակցութիւնները, որմէ ետք՝ հոգեճաշ:
«Հայր անոխակալ եւ բարեգութ, մաղթելով հայցեմք ի քէն վասն մեր ննջեցելոյն արժանաւորել
հանգստեան օթեւանի սրբոցն» (Շարական):
| All the contents on this site are copyrighted ©. |