Папа Фрањо ненајавено во посета на „Село за Земјата“

На 24 април папа Фрањо ненајавено ја посети „Село за Земјата“, манифестација која е во тек и се одржува во паркот Вила Боргезе во Рим. Настанот го организираа Ден на Земјата - Италија и римските фоколари. Ви благодарам – рече Светиот Отец на собраните – што ја преобразувате пустината во шума.

Папата во „селото“ во сред Рим пристигна во попладневните часови и спонтано се обрати на групата од околу 3500 луѓе. Заблагодари на фоколарините за нивната ангажираност околу екологијата, како и на блискоста со затворениците и борбата против коцкањето.

Еднаш – рече папа Фрањо – некој ми кажа дека зборот „конфликт“ во кинескиот јазик се состои од два знака: „ризик“ и „повод“. Потребно е да се прифати ризикот на приближувањето за да се запознае стварноста – напомена Папата истакнувајќи ја важноста на бесплатноста. Излгеда дека во овој свет, ако не платиш, не можеш да живееш; дека во центар на светот е „богот пари“: кој нема да му се поклони, завршува во глад, болест и експлоатација.

Освен тоа, ја нагласи важноста на опростувањето. Горчината и незадоволството нè оддалечуваат. Потребно е секогаш да градиме, свесни дека на сите нас за нешто ни е потребно опростување. Сите треба да работиме заедно, да се почитуваме и така ќе видиме „чудо“: пустина која станува шума – рече на крајот Папата.

РВ/Б.Р.