Թաթուլ Ալթունեանի անուան Հայաստանի երգի-պարի պետական վաստակաւոր համոյթը Իտալիոյ մէջ։

Թ.Ալթունեանի անուան Հայաստանի երգի-պարի պետական համոյթը, հինգշաբթի 14 ապրիլ 2016-ի երեկոյեան, ժամը 9-ին, Հռոմի ''Օրիոնէ'' անուամբ թատերասրահին մէջ ներկայացուց Իտալիոյ վեց քաղաքներու մէջ նախատեսուած ելոյթներէն առաջինը, ի ներկայութեան Հռոմաբնակ բազմաթիւ հայորդիներու եւ իտալացի բարեկամներու։

Այս առաջին անգման է որ փառքի բարձունքներ ու հազարաւոր ունկնդիրներու սրտեր նուաճած երգի պարի հայկական այս խումբը ելոյթներ կ՛ունենայ Իտալիոյ մէջ։

Երեկոյթին ներկայ էր նաեւ Հայաստանի հանրապետութեան Իտալիոյ մօտ արտակարգ եւ լիազօր դեսպան` Տիար Սարգիս Ղազարեան ինչպէս նաեւ Լեւոնեան Վարժարանի մեծաւոր Գերյ. Նարեկ Նաամոյեան։

''Թաթուլ Ալթունեան'' համոյթի իտալիոյ քաղաքներուն մէջ ներկայացումները տեղի կ՛ունենան հովանաւորութեամբ  Հռոմահայ` Տիար Ճիորճօ Ուրֆալեանին։

Հայաստանի երգի-պարի պետական համոյթը Հռոմէն ետք կը մեկնի Ֆիրենցէ, ապա Կուպպիօ հուսկ Պոլոնիա­, Փատովա եւ ի վերջոյ Միլանօ։ Համոյթի անդամները ապա 24 ապրիլին պիտի մասնակցին, Հռոմի` Փանթէոնի մօտ  կազմակերպուած, ապրիլեան նահատակներու ի յիշատակ` մէկ ձեռնարկին։ 

''Թաթուլ Ալթունեան'' համոյթին Հռոմի ելոյթը ոգեւորեց բոլոր ներկաները, որոնք երկու ժամ տեւողութեամբ երգի եւ պարերու ընդմէջէն, առիթը ունեցան  մօտէն ծանօթանալու հայ ազգի ժողովրդական բարձրորակ մշակոյթին։