Papa kujtoi 1050 vjetorin e pagëzimit të Polonisë

Në audiencën e përgjithshme duke përshëndetur shtegtarët polakë, Papa Françesku kujtoi se këto ditë Kisha në Poloni kremton 1050-vjetorin e pagëzimit të kombit. Ja si u shpreh Ati i Shenjtë:

“Së bashku me Barinjtë dhe besimtarët, falënderoj Zotin për këtë ngjarje historike, që në rrjedhë shekujsh formoi fenë, përshpirtërinë dhe kulturën e atdheut tuaj, në bashkësinë e popujve, që Krishti i ftoi të marrin pjesë në misterin e vdekjes dhe të ngjalljes së Tij. Falënderojeni Zotin - sipas fjalëve të Shën Gjon Palit II - për dhuratën, që e morët më se njëmijë vjet më parë duke u pagëzuar në emër të Atit e të Birit e të Shpirtit Shenjt e duke u kredhur në ujin i cili, përmes hirit, përkryen në ne figurën e Zotit të gjallë, në ujin, valë përjetësie: “Burim uji, që gurron për jetën e pasosur”(Gjn 4,14).

I lutem Zotit që breznia e sotme dhe breznitë e ardhshme të polakëve të jenë gjithnjë besnike ndaj hirit të pagëzimit e të japin dëshminë e dashurisë për Krishtin e për Kishën. Zoti i mëshirshëm i dhëntë bekimin e Tij të gjithë popujve polakë, që jetojnë në vend e jashtë tij. Qoftë lëvduar Jezu Krishti!”.

Sekretari i Shtetit të Vatikanit, kardinali Pietro Parolin, merr pjesë si Legat papnor në kremtimet jubilare, në Gniezno dhe në Poznań, nga 14 deri më 16 prill.