2016 թ. մարտի 16-ին Հաագա և Լուքսեմպուրգ քաղաքներում՝ Երերույք հնագիտական յուշարձանը և Անի Պեմզա գիւղը (Հայաստան), Տալինի Փաթառեյ ծովային բերդը (Էսթոնիա), Հելսինկի-Մալմի օդանաւակայանը (Ֆինլանտա), Դիեպի Քոլբերի բացուող կամուրջը (Ֆրանսիա), Կամպոս Հիոսը (Յունաստան), Էքստրեմադուրայի Սբ Անտոնիոս Պադուացու տաճարը (Իսպանիա) և Հասանքեյֆ հնագոյն քաղաքն ու նրա շրջակայքը (Թուրքիա) ճանաչուել են Եւրոպայի 2016 թուականի 7 առաւել վտանգուած յուշարձաններ: Այդ մասին Վենետիկում՝ ''Ատանեո Վենետոյում'' կայացած մամլոյ-ասուլիսի ժամանակ յայտարարել են ''Europa Nostra'' կազմակերպութիւնը և «Եւրոպականա ներդրումային բանկ ինստիտուտը» (EIBI): Այդ համատեքստում կկազմակերպուեն փորձագիտական այցելութիւններ դէպի վերոնշեալ յուշարձանները և կմշակուեն գործողութիւնների ծրագրեր, որոնք կներկայացուեն մինչև տարեվերջ:
«7 առաւել վտանգուածների» ծրագրին, որպէս ''Europa Nostra''-ի «Ժառանգութեան ինտեգրում» ցանցային նախագծի մի մասի, աջակցում է Եւրոպական միութեան «Ստեղծագործ Եւրոպա» ծրագիրը:
2013 թուականից սկսած, երբ մեկնարկեց «7 առաւել վտանգուածների» ծրագիրը, Եւրոպա Նոստրան և «Եւրոպական ներդրումային բանկ ինստիտուտը», հետևելով միջազգային մասնագէտների խմբի առաջարկութեանը, առաջին անգամ անցկացրեցին «Ժառանգութեան գոհարները» անուանակարգային մրցույթը, որի կարևոր պայմաններից է ընտրուող յուշարձանի Եւրոպայի և համամարդկային նշանակութիւնն ու արժէքը:
Առաջին անգամ այդ մրցանակին արժանացաւ Վենետիկեան ծովածոցը (Իտալիա): Վենետիկեան ծովածոցը Միջերկրական ծովի Եւրոպայի ամենայայտնի և ամենակարևոր անցումային էկոհամարգերից մեկն է, որը կազմում է 550 քառ. կմ: Այն պաշտպանած է ԵՄ-ի օրէնսդրութեամբ և մի շարք ազգային օրէնքներով, իսկ 1987 թ-ից Վենետիկի հետ միասին ընդգրկուել է ՅՈՒՆԵՍԿՕ-ի համաշխարհային ժառանգութեան ցանկում:
2016 թուականի 7 առաւել վտանգուած յուշարձաններն Եւրոպա Նոստրայի խորհրդի կողմից ընտրուել են 14 առաւել վտանգուած յուշարձանների ցանկից, իսկ վերջինս իր հերթին ձևաւորուել և ընտրուել էր պատմաբանների, հնագէտների, ճարտարապետների, նախագծողների և ֆինանսական վերլուծաբանների կողմից:
All the contents on this site are copyrighted ©. |