Ռուսիոյ նախագահ Վլատիմիր Փութին հրամայեց ռուսական ուժերու «հիմնական բաժինը» Սուրիայէն հեռացնելու` նշելով, որ անոնք մեծաւ մասամբ իրագործած են ճշդուած նպատակները: Ռուսական ուժերու հեռացումը պիտի սկսի այսօր:
Քրեմլին յայտնեց, որ Փութին ռուսական ուժերու «հիմնական բաժին»¬ի Սուրիայէն հեռացնելու հարցը համակարգած է Սուրիոյ նախագահ Պաշշար Ասատի հետ հեռաձայնային հաղորդակցութեան մը ընթացքին: Ան Ասատին յայտնած է, որ Հմայմիմ օդուժի եւ Թարթուսի ծովուժի ռազմակայանները պիտի շարունակեն գործել բնականոն կերպով:
Քրեմլին նշեց, որ որոշումը տրուած է Սուրիոյ մէջ ռուսական ուժերու զինուորական գործողութեան նպատակներուն` ահաբեկչութիւնը պարտութեան մատնելէ եւ Սուրիոյ մէջ քաղաքական հոլովոյթի նախաձեռնումէն ետք:
Սուրիոյ նախագահական պալատը հաստատեց լուրը` նշելով, որ Փութին եւ Ասատ համաձայնութիւն գոյացուցած են ռուսական ուժերու նուազեցման շուրջ:
Իսրայէլեան լրատուամիջոցներ յայտնեցին, որ Փութինի որոշումը անակնկալի մատնած է աշխարհի երկիրները, ներառեալ` Իսրայէլը:
All the contents on this site are copyrighted ©. |