Пройдзе звычайны кансісторый па кананізацыйных справах

15 сакавіка 2016 г. папа Францішак узначаліць Звычайны кансісторый па кананізацыйных справах. Аб гэтым паведаміла 7 сакавіка 2016 г. Служба папскіх літургічных цэлебрацый. Кансісторый распачнецца малітвай Літургіі гадзін.

Кардыналы, прысутныя ў гэты час у Рыме, збяруцца ў Зале кансісторыяў Апостальскага палаца для разгляду спраў кананізацыі благаслаўлёных: кс. Станіслава Папчынскага, заснавальніка Кангрэгацыі Айцоў Марыянаў Беззаганнага Зачацця Найсвяцейшай Панны Марыі; Хасэ Санчэса дэль Рыа, мексіканскага хлопчыка, які падчас паўстання крыстэрас быў прысуджаны да смерці за адмову адысці ад каталіцкай веры; аргентынскага святара Хасэ Габрыэля Дэль Разарыё Бракера; шведскай законніцы і медсястры Марыі Элізабэты Хэсэльблад; а таксама Тэрэзы Калькуцкай, сусветнавядомай заснавальніцы Кангрэгацыі Сясцёр Місіянерак Божай Любові.

Раней Папа даручыў Кангрэгацыі па справах Кананізацыі публікацыю дэкрэтаў аб сапраўднасці цудаў, здзейсненых праз заступніцтва гэтых благаслаўлёных.