Թուրքիա պէտք է գաղթականներու Եւրոպա հոսքը Նուազեցնէ կ՛ըսէ Յունաստանի վարչապետը
Յունաստանի վարչապետ Ալեքսիս Ցիփրաս Եւրոպական խորհուրդի նախագահ Տոնալտ Թուսքի հետ Աթէնքի մէջ տեղի ունեցած հանդիպումէն ետք յայտարարեց, որ Անգարա պէտք է ընդունի այն միջոցները, որոնք 7 մարտին Եւրոպական Միութիւն-Թուրքիա վեհաժողովին ընթացքին պիտի մշակուին Եւրոպա գաղթականներու հոսքը նուազեցնելու համար:
«Յառաջիկայ բարձր մակարդակի հանդիպումին պէտք է մշակել միջոցներ, որոնք պէտք է ընդունուին Թուրքիոյ կողմէ գաղթականներու հոսքը նուազեցնելու համար», յայտարարեց Ցիփրաս:
Ան նաեւ յայտնեց, որ 8 մարտին ինք պիտի այցելէ Իզմիր` մասնակցելու համար Թուրքիոյ հետ համագործակցութեան Բարձրագոյն խորհուրդի չորրորդ նիստին:
Ցիփրաս նշեց, որ Յունաստան վեհաժողովին ընթացքին անդամ բոլոր պետութիւններէն պիտի պահանջէ յարգել եւրոպական դաշնագիրը եւ պատժամիջոցներ հաստատել բոլոր անոնց դէմ, որոնք զայն չեն յարգեր: «Կը պահանջենք դադրեցնել Եւրոպայի մէջ միակողմանի քայլերը», ըսաւ ան:
Ցիփրաս ըսաւ, որ Յունաստան պիտի շարունակէ իր կարելին ընել ապահովելու համար, որ որեւէ գաղթական անտէր չմնայ, սակայն Յունաստան առանձին չի կրնար բեռը վերցնել:
«Պիտի չարտօնենք, որ Յունաստանը կամ որեւէ այլ երկիր հոգիներու շտեմարանի վերածուի: Մենք Եւրոպայի ապագային մէջ վճռորոշ պահու առջեւ կանգնած ենք», ըսաւ ան` նշելով. «Ջանք պիտի չխնայենք գործադրելու համար Շենկենի համաձայնութիւնն ու Ժընեւի դաշնագիրը: Մարդիկ ծով պիտի չվերադարձնենք եւ մանուկներուն կեանքերը պիտի չվտանգենք»:
| All the contents on this site are copyrighted ©. |