«Արմէնփրես»` վկայակոչելով ամերիկեան լրատուամիջոցները, կը հաղորդէ, որ միլիառատէր Տոնալտ Թրամփ Նեւատա նահանգին մէջ Հանրապետական կուսակցութեան նախագահական թեկնածու առաջադրուելու ներկուսակցական ընտրութիւններուն ընթացքին համոզիչ յաղթանակ արձանագրած է` ապահովելով քուէներուն 42 առ հարիւրը:
Ըստ կարգ մը տուեալներու, Թրամփ առաւել մեծ թիւով ձայներ հաւաքած է նոյնիսկ Լատին Ամերիկայէն սերածներու շրջանակին մէջ, հակառակ անոր որ բազմիցս յայտարարած է Մեքսիքայի հետ սահմանին պարիսպ կառուցելու անհրաժեշտութեան մասին` գաղթականներու հոսքը զսպելու համար:
Երկրորդ դիրքին համար պայքարը կ՛ընթանայ Ֆլորիտայէն ծերակուտական Մարք Ռուպիոյի եւ Թեքսասէն ծերակուտական Թետ Քրուզի միջեւ, որոնք նախնական տուեալներով, հաւաքած են ձայներուն համապատասխանաբար 25 եւ 21 առ հարիւրը:
Նախնական տուեալներով` Նեւատայի մէջ կուսակցական ժողովներուն մրցանշային թիւով ընտրողներ մասնակցած են: Նոյն ատեն, քուէարկութեան բազմաթիւ վայրերէ տեղեկութիւններ ստացուած են ընտրութիւններու չափազանց վատ կազմակերպման, մէկէ աւելի անգամներ քուէարկելու առանձին մասնակիցներու փորձերու եւ քուէներու հաշուարկման ընթացքին կատարեալ քաոսի վերաբերեալ:
Հանրապետական կուսակցութեան «Թուիթըր»-ի պաշտօնական էջին մէջ խոստում հրապարակուած է ամենայն լրջութեամբ այդ դէպքերէն իւրաքանչիւրը հետաքննելու մասին:
Նեւատան դարձած է Միացեալ Նահանգներու չորրորդ նահանգը, ուր տեղի ունեցած են հանրապետականներու ներկուսակցական ընտրութիւնները: Անոնցմէ երկուքին մէջ յաղթանակ արձանագրած է Տոնալտ Թրամփը, ան միայն Այոայի մէջ զիջած է Թետ Քրուզին:
Ներկուսակցական յաջորդ ընտրութիւնները տեղի պիտի ունենան «գերերեքշաբթի»`1 մարտին, երբ միաժամանակ նախնական ընտրութիւնները պիտի կատարուին 10-է աւելի նահանգներու մէջ:
All the contents on this site are copyrighted ©. |