Հիւսիսային Քորէա արբանեակի յաջող արձակում մը կատարեց
Հիւսիսային Քորէան 7 փետրուարին հրթիռ մը արձակելով «Քվանմենսոն 4» արբանեակը հասցուցած է Երկրի ուղեծիր: Այդ քայլը Ճափոնի, Հարաւային Քորէայի եւ շարք մը այլ երկիրներու կողմէ նկատուեցաւ հեռահար հրթիռի փորձարկում:
ԹԱՍՍ լրատու գործակալութիւնը կը հաղորդէ, որ կը սպասուի, որ ՄԱԿ-ի Ապահովութեան խորհուրդը այդ հարցով արտակարգ նիստ մը գումարէ:
ՄԱԿ-ի ընդհանուր քարտուղար Պան Քի Մուն Հիւսիսային Քորէային կոչ ուղղած է «դադրեցնելու սադրիչ գործողութիւնները»: Դէպքը դատապարտած են նաեւ Հարաւային Քորէան, Ճափոնը, Ֆրանսան, Չինաստանը, Ռուսիան եւ Միացեալ Նահանգները:
Միացեալ Նահանգներու արտաքին գործոց նախարար Ճոն Քերրի նշած է. «Մենք պիտի շարունակենք աշխատանքը մեր գործընկերներուն եւ ՄԱԿ-ի Ապահովութեան խորհուրդին հետ` Հիւսիսային Քորէան պատասխանատուութեան կանչելու ուղղութեամբ»:
Հայաստանի Հանրապետութեան Արտաքին Գործոց
Նախարարութիւնը Կը Դատապարտէ
Հայաստանի Հանրապետութեան արտաքին գործոց նախարարութիւնը դատապարտեց Հիւսիսային Քորէայի կողմէ հեռահար հրթիռի արձակումը: «Արմէնփրես»-ի հաղորդումով` այս մասին նշուած է Հայաստանի Հանրապետութեան արտաքին գործոց նախարարութեան «ֆէյսպուք»-ի էջին մէջ:
«Կը դատապարտենք Հիւսիսային Քորէայի կողմէ հեռահար հրթիռի արձակումը, որ կը խախտէ ՄԱԿ-ի Ապահովութեան խորհուրդի բանաձեւերը եւ Քորէական թերակղզիի շրջանին մէջ կը սրէ իրավիճակը», նշած է նախարարութիւնը:
| All the contents on this site are copyrighted ©. |