(Ռատիօ Վատիկան) Լիւտերենական դաշնակցութիւնը եւ կաթողիկէ Եկեղեցին Համամիութենական միացեալ վերակոչում մը պիտի կատարեն Շուետի Lund քաղաքին մէջ, յառաջիկայ 31 Հոկտեմբեր 2016-ին, ի պատրաստութիւն վերանորոգումի 500ամեակին յոբելեանին։
''Միասնաբար գործելով սատարած կ՛ ըլլանք լիւտերականներու ու կաթողիկէներու վերահաշտութեան եւ արդարութեան ու խաղաղութեան վերահաստատումին։ Միասնաբար պիտի աղօթենք Շուէտի քրիստոնեաներուն համար եւ ի նպաստ քրիստոնեաներու միութեան'' յայտնած է վերապատուելի Մարթին Եունկ վերոնշեալ ձեռնարկի մասին արտայայտուելով։
Իր կարգին կարդինալ Քոխ` նախագահը քրիստոնեաներու միութեան քահանայապետական խորհուրդին յայտնած է ''միասնաբար կեդրոնանալով Աստուծոյ վրայ լիւտերականներն ու կաթողիկէները կը խորացնեն իրենց հաւատքը խաչեցեալ ու յարուցեալ Քրիստոսի վրայ''։
Շուէտի կաթողիկէ եկեղեցւոյ առաջնորդ` գերապայծառ Անտէրս Ապորելիուս ապա յայտնած է ''Շուէտի համամիութենական իրավիճակը եզակի է ու շահագրգիռ։ 2017 տարուայ ընթացքին կը զուգադիպին երկու տարեդարձներ` լիւտերական վերանորոգումի 500-րդ տարեդարձը եւ 50-րդ տարեդարձը լիւտերական ու կաթողիկէ միջազգային երկխօսութեան, որուն անմիջական արդիւնքը եղաւ ʺարդարացումի վարդապետութեան միացեալ յայտարարութիւնը'' ստորագրուած 1999-ին որ վերջ դրաւ, երկու եկեղեցիներու միջեւ գոյացած հին ու դարաւոր բանավէճերու։
All the contents on this site are copyrighted ©. |