«Կը Յիշեմ եւ կը պահանջեմ» խորագիրին տակ կարելի չէ զանց առնել հայ երգի փրկիչը` Կոմիտաս վարդապետը, որ ոչ թէ ֆիզիքապէս նահատակուեցաւ, այլ հոգեպէս տանջահար հրաժեշտ տուաւ կեանքին:
Հովանաւորութեամբ Հայոց Ցեղասպանութեան 100ամեակի Սուրիոյ Կեդրոնական Մարմնին, նախագահութեամբ Արհ. Տ. Պետրոս Արք. Միրիաթեանին` Առաջնորդ Բերիոյ Հայոց Կաթողիկէ Համայնքին, կազմակերպութեամբ հայ կաթողիկէ Ս. Երրորդութիւն եկեղեցւոյ Մշակութային Յանձնախումբին Կիրակի, 17 Յունուարի յետմիջօրէին, «Աղաճանեան» սրահէն ներս, հանդիսաւոր կերպով նշուեցաւ հայ ժողովըրդային երաժշտութիւնը կործանումէ փրկող Կոմիտաս վարդապետի ութսուներորդ յոբելինականը:
Կոմիտասի բեղմնաւոր ստեղծագործութիւնները կարելի չէր ամփոփել վայրկեաններու կամ ժամերու մէջ: Ելոյթը սկսաւ բեմավարութեամբ Սիւզի եւ Մեղեդի Տատաղլեաններու. անոնք ներկայացուցին Կոմիտաս վարդապետի կենսագրականը: Ելոյթի յայտագիրին մէջ ազդեցիկ էին Կոմիտասի կեանքէն քաղուած կենդանի պատկերները:
Ելոյթի հիմնական նպատակն էր լուսարձակի տակ առնել Կոմիտասի ցուցաբերած սէրը հայ երաժշտութեան եւ երգին նկատմամբ, ապա նաեւ անոր եզակի տաղանդ ու դերը հայ երգի ու երաժըշտութեան պանծացման մէջ:
Մշակութային Յանձնախումբի անդամները թատերական ներկայացումով մարմնաւորեցին Կոմիտասը որպէս հայ երգի դեսպան Պերլինի, Փարիզի եւ Թիֆլիսի մէջ, միջազգային ամպիոններու վրայ իր տուած դասախօսութիւններով: Դերակատարներն էին. Կոմիտաս Քհնյ. Տատաղլեան` Կոմիտասի դերով, Սարգիս Փօլատեան` Արշակ Չոպանեանի դերով, Մարտօ Տատաղլեան` Դանիէլ Վարուժանի դերով եւ Անի Մորան` Վարուժանի քրոջ դերով:
Կոմիտաս վարդապետը կարեւոր տեղ գրաւած է նաեւ հայ գրականութեան նշանաւոր դէմքերու գործերուն մէջ: Այդ գործերէն ընտիր գոհարներ ասմունքեցին Վեհան Պարսումեան եւ Մելինէ Պէզճեան:
Հնչեց Կոմիտասի մշակած «Արի եար ջան»ը եւ «Գառնի» պարախումբի անդամ Արին Սէֆէրեան նազանքով պարեց` հմայելով ներկաները:
Մշակութային Յանձնախումբին կողքին, Տէր Կոմիտաս Քհնյ. Տատաղլեան մեծ աշխատանք տարած էր ձեռնարկի ընդհանուր յայտագիրի պատրաստութեան ուղղութեամբ:
Հուսկ խօսք առաւ գերապայծառ հայրը, որ շեշտեց, թէ Կոմիտասի մահուամբ կարելի չէր ընդհատել Կոմիտասեան երթը ու ան շարունակուեցաւ սերունդէ սերունդ: Վկա՛յ այս ելոյթը, որուն շնորհիւ հաղորդըւեցանք Կոմիտասի հոգիով ու շունչով` երգի, թատրոնի եւ ասմունքի միջոցաւ: Գեռապայծառ հայրը գնահատեց հալէպահայութիւնը, որ, հակառակ տիրող ծանր պայմաններուն, աննկուն կամքով կը կառչի իր արժէքներուն, ապա պահպանիչով փակեց երեկոն:
All the contents on this site are copyrighted ©. |