Ֆրանչիսկոս Պապին 14 յունուարի պաշտօնական հանդիպումները

(Ռատիօ Վատիկան) Հինգշաբթի` 14 Յունուար 2016-ի առաւօտեան, Ֆրանչիսկոս Սրբազան Քահանայապետը իր գրասենեակին մէջ յաջորդաբար ընդունեց Պրազիլի մօտ առաքելական դեսպան գերապայծառ Ճովաննի Տանյելլօ, Զիմպապուէյի մօտ առաքելական դեսպան գերապայծառ Մարէք Զալեվսքի ապա  Փերուէն երեք եպիսկոպոսներ։

Ժամը 11-ին Սրբազան Քահանայապետը առաքելական պալատի Ամպրոզեան սրահին մէջ ունկնդրութիւն շնորհեց Ինքնաշարժի միջազգային դաշնակցութեան ''ՖԻԱ''-ի նախագահ եւ  ճանապարհներու ապահովութեան ՄԱԿ-ի յատուկ պատգամաւոր` Ժան Թոտին ու անոր ընկերացող պատուիրակութեան։ Սրբազան Հայրը ապա ընդունեց Հռոմի Օդակայանի նախագահ` Ֆապրիցիօ Փալենզոնան ու անոր ընկերացող պատուիրակութիւնը հուսկ ընդունեց Տէ Կասփերի հիմնարկի պատուոյ նախագահ` Տիկին Մարիա Ռոմանա Տէ Կասփերին ապա` 11.45-ին Վատիկանի Մատենադարանին մէջ ունկնդրութիւն շնորհեց Հռոմի Արժանթինեան Քահանայական Վարժարանի հասարակութեան 17 անդամներուն։ 

Յայտնենք թէ Ժան Թոտին հետ հանդիպման ընթացքին շօշափուեցաւ ''ճանապարհներու ապահովութեան'' հարցը ուր` աշխարհի մէջ ամէն օր 500 մանուկներ կը մեռնին ճամբաներու վրայ եւ ամէն տարի աւելի քան 1,3 միլիոն անհատներ զոհ են ճամբաներու վրայ տեղի ունեցող արկածներուն։ Հանդիպման ընթացքին Ժան Թոտ Քահանայապետէն խնդրեց որ յատուկ աղօթք մը կատարէ Ֆորմուլա1-ի երբեմնի վարորդ եւ ախոյեան Միքայէլ Շումախերի համար եւ Քահանայապետը յօժարակամ ընդունած է այս մէկը։