Ватыканскі кардынал: Папа не супраць капіталізму

Святы Айцец не выступае супраць капіталізму як такога, а толькі папярэджвае перад апантанасцю прыбыткам і абагаўленнем рынку. Гэта падкрэсліў старшыня Папскай рады “Iustitia et Pax” падчас канферэнцыі на тэму будучыні буйных карпарацый, якая праходзіць у Чылі.

Паводле меркавання Францішка, бізнес павінен паважаць чалавечую годнасць і служаць агульнаму дабру, заўважыў кардынал Пітэр Тарксан. Ён таксама звярнуў увагу на шкоднае абуджэнне рынкам нястрымнага спажывання і кантролю тэхналагічнага развіцця, не прымаючы пад увагу маральных прынцыпаў.

Папа неаднаразова падкрэсліваў, што быць бізнесмэнам гэта пачэсная задача, галоўная мэта якой заключаецца ў садзейнічанні развіццю чалавечага патэнцыялу, нагадаў падчас чылійскай канферэнцыі кіраўнік ватыканскай дыкастэрыі. Таксама важнай задачай сучаснага бізнесу з’яўляецца клопат аб навакольным асяроддзі, і, асабліва, дэкарбанізацыя сусветнай эканомікі, дадаў кардынал Тарксан.