Բեթղեհեմի մէջ Սուրբ Ծննդեան Պատարագ եւ դռնբացէքի արարողութիւնը։
24 դեկտեմբերի կէսգիշերին` Երուսաղէմի Լատին պատրիարք` Ֆուատ Թուալը պաղեստինեան Բեթղեհեմի մէջ մատուցած Սուրբ Պատարագի ընթացքին արտասանած քարոզին մէջ դիմած է միջազգային հանրութեան` յորդորելով գթասիրութիւն եւ դռները բանալ Մերձաւոր Արեւելքէն միլիոնաւոր փախստականներու առջեւ։
Կէսգիշերային պատարագէն առաջ Թուալ Պատրիարք բացումը կատարեց նաեւ Ողորմութեան Յոբելենական Սուրբ Դրան։ Ան` իր քարոզին մէջ յիշեց անցնող տարուան իրադարձութիւնները, որոնք տարածաշրջանին մէջ մթագնուեցան պատերազմներով ու զանգուածային գաղթերով, ինչպէս նաեւ Սուրբ հողին վրայ պաղեստինա-իսրայէլական հակամարտութեան բռնկումով, երեք ամսուան ընթացքին երկուստէք խլուած 150 մարդու կեանքը:
«Մեր սրտերը միլիոնաւոր փախստականներու հետ են, որոնք պատսպարան գտած են ճամբարներու ու յետնախորշերու մէջ, անոնց հետ, որոնք կը փախչին հակամարտութիւններու գօտիներէն։ Մենք կը մտածենք ահաբեկչութեան բոլոր ձեւերու զոհերուն մասին: Կարեւոր չէ` որոնք են անոնք եւ ինչ ցեղէ, բոլոր այդ մարդիկ մեր եղբայրներն ու քոյրերն են… Թող անոնց ցաւի ճիչերը դառնան մերը, եւ մենք կոտրենք անտարբերութեան պատնէշները»,- ըսաւ պատրիարքը:
Իր քարոզին մէջ Պատրիարքը շնորհակալութիւն յայտնեց ապա «այն երկիրներուն, որոնք իրենց դռները բացին եւ ընդունեցին փախստականները: Մենք կը յորդորենք անոնց, որոնք կը տատանին, յաղթահարել փախստականներու հանդէպ ունեցած վախերը եւ ապաստան տալ անոնց այնքան ժամանակ, քանի դեռ իրադրութիւնը բնական չէ», ըսաւ Թաուլ Պատրիարքը։
| All the contents on this site are copyrighted ©. |