TOLLE GRABATUM TUUM ET AMBULA
Merre shtrojen tënde e ec…
Skena VIII derdh në bronz emocionin e njeriut të paralizuar, që bën hapat e para, i nxitur nga një urdhër i papritur i Jezusit: “Merre shtrojen tënde e shko në shtëpi!” (Mt 9,6).
Por para se t’i shërojë korpin, Jezusi shikon thellë në zemrën e gjytrymit e sheh në të një rrogomisje mëkatesh, si retë në ditë stuhie, e, mes tyre, edhe një rreze të hollë shprese e një fill të artë pendimi. Prandaj i thotë: “Zemër, biri im, t’u falen mëkatet!” (Mt 9,2).
Njerëzit për rreth mbeten me gojë hapur nga habia e arrijnë të mendojnë zi e më zi. Pastaj nisin të thonë haptas: “Ky blasfemon” (Mt 9,3). Por Jezusi e bën këtë mrekulli, e shëron paralitikun, pikërisht që të gjithë ta kishin të qartë se Ai ishte dora e shtrirë e Zotit, për t’i nxjerrë nga honi i mëkatit.
Por mrekullia e vërtetë është ajo e faljes. Shërimi i vërtetë i shpirtit të larë e të pastruar me ujin e Mëshirës së pashterrshme të Zotit: ky ujë iu dorëzua Kishës e meshtarëve të saj, që janë dora e Jezusit. Dorë, që fal e shëron. E ky është kuptimi e edhe qëllimi i Jubileut.
Me të drejtë Gilberto Chesterton, në çastin kur vendosi të bëhej katolik, deklaroi publikisht: “Po bëhem katolik, që të mund të rrëfehem. Edhe po t’i sillem rreth e rreth gjithë botës, e di se vetëm në Kishën Katolike mund të gjej një njeri të autorizuar drejtpërdrejt nga Zoti për të m’i falur mëkatet”.
E pas Rrëfimit të parë, brohoriti: “Ç’mrekulli! Ndërsa meshtari m’i zgjdhte mëkatet e më jepte ndjesën e Zotit, m’u duk se bota u përmbys… ishte e shtrembër, e u bë e drejtë!”.
Përvojë, kjo, që mund ta provojmë të gjithë: mjafton të gjunjëzohemi!
Të lutemi:
Jezus,
Ti je falja e Zotit.
Je Ai, që u bë
i afërmi ynë!
Në Sakramentin
e Rrëfimit
krahët e tu mëshirplotë,
më rrokin,
më shërojnë,
më kthejnë përsëri në jetë.
Jezus,
ndihmomë ta kuptoj
bukurinë e këtij Sakramenti.
Amen.
All the contents on this site are copyrighted ©. |