Ամերիկայի Հայ աւետարանչական ընկերակցութիւնը 4 Դեկտեմբերին, Սուրբ Ծնունդի եղանակի
սկզբնաւորութեան ներկայացուց «Սուրբ Ծնունդի Լաւագոյնը» տօնական համերգը, որ տեղի ունեցաւ
Փըրեմըսի Հայ երիցական եկեղեցւոյ մէջ: Համերգը կազմակերպուած էր Անիթա Պուչագճեանի եւ
Սեդա Նալպանտեանի կողմէ, համագործակցութեամբ երգչուհի Սոլանժ Մերտինեանի: Գեղեցկօրէն
զարդարուած եկեղեցւոյ սրահին մէջ հնչեցին Սուրբ Ծնունդի սիրուած երգեր, ի միջի այլոց
«Լուռ գիշեր», «Ոհ, սուրբ գիշեր» եւ «Լսեցէ՛ք, կ՛երգեն հրեշտակք», զորս գեղեցկօրէն կատարեցին
երգիչ-երգչուհիներ Կրեկըրի Լոշխաճեան, Ծովինար Աղաւեան, Անոյշ Պարքլէյ եւ Սոլանժ Մերտինեան,
դաշնակի ընկերակցութեամբ Ռիքօ Հիկումայի:
Յայտագիրին մէջ ելոյթ ունեցան նաեւ Սիփան Հայ վարժարանի երգչախումբը՝ ներկայացնելով «Առաջին
Ծնունդը», «Նոր Տարի» եւ «Ձիւնին մէջէն» երգերը:
Համերգը վերջ գտաւ մասնակցութեամբ ներկաներուն, որոնք ուրախութեամբ աւետեցին Յիսուսի
Ծնունդը՝ յոտնկայս երգելով «Ծափ զա՛րկ աշխարհ, Ցնծա՛ այսօր» սիրուած Ծնունդի երգը:
Ամերիկայի Հայ աւետարանչական ընկերակցութիւնը քրիստոնէական կազմակերպութիւն մըն է, որ
իր ծառայութիւնները կը մատուցանէ որպէս աւետարանչական բազուկը աշխարհացրիւ Հայ աւետարանական
եկեղեցիներուն: Այս տօնական համերգին համար եղած նուէրներու հասոյթը պիտի յատկացուի Ծնունդի
ծրագիրներու, որոնք կ՛իրականացուին Հայաստանի եւ Ղարաբաղի մէջ 1990էն ի վեր, բաժնելով
Քրիստոսի սէրը հազարաւոր մանուկներու:
All the contents on this site are copyrighted ©. |