മുന്‍പാപ്പാ ബനഡിക്ടിന്‍റെ നാമത്തില്‍ ഗ്രന്ഥാലയം റോമില്‍
റോമിലുള്ള പുരാതനമായ ജര്‍മ്മന്‍ സെമിനരിയോടു ചേര്‍ന്നാണ് മുന്‍പാപ്പാ ബനഡിക്ടിന്‍റെ ദൈവശാസ്ത്ര-തത്വശാസ്ത്ര പുസ്തകങ്ങളുടെ ശേഖരങ്ങളുള്ള ഗ്രന്ഥാലയം തുറന്നിരിക്കുന്നതെന്ന്, സെമിനരിയുടെ ഡയറക്ടര്‍ മോണ്‍സീഞ്ഞോര്‍ സ്റ്റീഫന്‍ ഹെയ്ഡ് അറിയിച്ചു.
പാപ്പാ റാത്സിങ്കറിന്‍റെ ചിന്താധാരയും ദൈവശാസ്ത്ര വ്യാഖ്യാനങ്ങളും ഉള്‍ക്കൊള്ളുന്ന പ്രബന്ധങ്ങളുടെയും ശാസ്ത്രീയപഠനങ്ങളുടെയുംകൂടി ശേഖരമാണ് നവംബര്‍ 18-ാം തിയതി ബുധനാഴ്ച ഉത്ഘാടനംചെയ്യപ്പെട്ട വത്തിക്കാനോടു ചേര്‍ന്നുള്ള ജര്‍മ്മന്‍ സെമിനരിയില്‍ പ്രവര്‍ത്തിക്കുവാന്‍ പോകുന്ന സവിശേഷമായ ഗ്രന്ഥാലയം. റാത്സിങ്കര്‍ ഗ്രന്ഥാലയത്തിന്‍റെ ഉത്ഘാടനം നിര്‍വ്വഹിച്ചത് സാംസ്ക്കാരിക കാര്യങ്ങള്‍ക്കായുള്ള പൊന്തിഫിക്കല്‍ കൗണ്‍സിലിന്‍റെ പ്രസിഡന്‍റ്, കര്‍ദ്ദിനാള്‍ ജ്യാന്‍ഫ്രാങ്കോ റവാത്സിയാണ്.
ഇപ്പോള്‍ത്തന്നെ 37 ഭാഷകളിലുള്ള ആയിരത്തിലേറെ പുസ്തകങ്ങളുള്ളതാണ് റാത്സിങ്കര്‍ ഗ്രന്ഥശേഖരം. സ്ഥാനത്യാഗം ചെയ്ത പാപ്പാ ബനഡിക്ട് തന്‍റെ ശേഖരത്തില്‍നിന്നും പങ്കുവച്ച ഗ്രന്ഥങ്ങളില്‍ അധികവും അദ്ദേഹത്തിന്‍റെ കൈയ്യൊപ്പുള്ളതാണെന്നും ഫാദര്‍ ഹെയ്ഡ്സ് ഉത്ഘാടനച്ചടങ്ങളില്‍ വ്യക്തമാക്കി. പാപ്പാ ബനഡിക്ട് രചിച്ച ‘നസ്രായനായ യേശു’ എന്ന കൃതിയുടെ പ്രഥമവാല്യം ക്രിസ്തുവിന്‍റെ ശൈശവകാലം ചിത്രീകരിക്കുന്ന മൂലകൃതിയുടെ മലയാളപരിഭാഷ ഈ ശേഖരത്തില്‍ ഉള്‍പ്പെടുന്നുണ്ട് (Jesus of Nazareth Vol.I).
സഭയുടെ പണ്ഡിത വരേണ്യനായ പാപ്പായുടെ ബുക്കുകളും അവയുടെ വിവര്‍ത്തനങ്ങളും പഠനങ്ങളും കൂടാതെ, പാപ്പാ റാത്സിങ്കറിനെക്കുറിച്ചും അദ്ദേഹത്തിന്‍റെ കൃതികളെ അധികരിച്ചും എഴുതപ്പെട്ടിട്ടുള്ള ഗ്രന്ഥങ്ങള്‍ ശേഖരത്തിന്‍റെ തനിമയായിരിക്കുമെന്നും ഫാദര്‍ ഹെയ്ഡ് വിവരിച്ചു.
| All the contents on this site are copyrighted ©. |