Նախագահ Սերժ Սարգսեանն այսօր ցաւակցական հեռագիր է յղել Ֆրանսիայի Հանրապետութեան Նախագահ Ֆրանսուա Օլանդին՝ այս գիշեր Փարիզում տեղի ունեցած ահաբեկչութիւնների կապակցութեամբ: Այս մասին յայտնում են ՀՀ Նախագահի մամուլի ծառայութիւնից:
«Մեծարգոյ պարոն Նախագահ,
Խորապէս ցնցուած եմ այս գիշեր Փարիզում տեղի ունեցած՝ իր մասշտաբներով աննախադէպ ահաբեկչութիւնների լուրից:
Խստագոյնս դատապարտում եմ այդ զարհուրելի գործողութիւնները, որոնք բազմաթիւ անմեղ կեանքեր խլեցին:
Վերջին տարիներին աշխարհի տարբեր երկրներում այսօրինակ անմարդկային բնոյթի բռնութիւնների աճը լուրջ մտահոգութեան տեղիք է տալիս: Վստահ եմ, որ քաղաքակիրթ հանրութեան իւրաքանչիւր անդամ կմիանայ բոլորիս պատուհասած այս չարիքի դէմ պայքարին: Մենք չենք կարող թոյլ տալ, որ բռնութիւնը, ծայրայեղականութիւնը և անհանդուրժողականութիւնը գերիշխեն: Մենք պարտաւոր ենք համատեղ ջանքերով բացայայտել և արմատախիլ անել այն բոլոր գործօնները, որոնք ծայրայեղականութեան նման սարսափազդու դրսևորումների պատճառ են դառնում:
Այս դժուարին պահին Հայաստանը եղբայր Ֆրանսիայի կողքին է և պատրաստ է ամենայն աջակցութիւն ցուցաբերել:
Խորին ցաւակցութիւն եմ յայտնում Ձեզ, մեծարգոյ պարոն Նախագահ, Ֆրանսիայի բարեկամ ժողովրդին և զոհուածների հարազատներին՝ մաղթելով համբերութիւն, ուժ ու կորով, իսկ վիրաւորներին՝ շուտափոյթ ապաքինում:
Ֆրանսիացի ժողովրդի հետ են մեր աղօթքները, սրտերն ու հոգիները»,- ասուած է ՀՀ Նախագահի ցաւակցական հեռագրում:
All the contents on this site are copyrighted ©. |