Տօն Սրբոց Հրեշտակապետաց՝ Գաբրիէլի, Միքայէլի, Ռափայէլի, Սերովբէից, Քերովբէից....
Զմմառու վանքին համար իւրայատուկ նշանակութիւն ունի Սրբոց Հրեշտակապետաց եւ յատկապէս
Ս. Միքայէլ Հրեշտակապետի տօնը, որ միաժամանակ անուանակոչութեան տօնն է Զմմառու Դպրեվանքին:
Դպրեվանքի հիմնադրութենէն ի վեր Ս. Միքայէլ Հրեշտակապետը հանդիսացած է Դպրեվանքի հովանին
և հզօր պահապանը: Հայ Եկեղեցւոյ Տօնացոյցին համաձայն, «Սրբոց Հրեշտակապետաց» տօնը կը
կատարուի Ս. Խաչի տօնին յաջորդող ութերորդ Շաբաթ օրը: Աւանդութեան համաձայն ամէն տարի,
սոյն տօնին՝ Զմմառու Պատրիարքական Միաբանութիւնը, նախագահութեամբ Ամեն. Կաթողիկոս-Պատրիրաքին,
Եպիսկոպոսաց դասուն, Վարչական Խորհուրդին, Միաբան Վարդապետներուն և Թեմական Կղերին մասնակցութեամբ,
Զմմառու վանքի ընծայարանի կղերիկոսներուն հետ միասնաբար կը տօնախմբէ «Սրբոց Հրեշտակապետաց»
տօնը: Շաբաթ 7 Նոյեմբեր 2015-ին, առաւօտեան ժամը 10:30-ին, Սրբոց Հրեշտակապետացն՝ Գաբրիէլի,
Միքայէլի և Ռափայէլի, Սէրովբէից, Քերովբէից և ամենայն Երկնային Զօրացն տօնին առիթով,
Սուրբ և անմահ Պատարագը պիտի մատուցանէ Տանն Կիլիկիոյ Կաթողիկէ Հայոց Ամենապատիւ և Գերերջանիկ
Տէր Գրիգոր Պետրոս Ի. Կաթողիկոս Պատրիարքը մայրավանքիս եկեղեցւոյ մէջ: Հրեշտակապետացն
տօնին առթիւ՝ Ամենապատիւ Հոգեւոր Տէրը սարկաւագ պիտի ձեռնադրէ Զմմառու դպրեվանքի ուսանող՝
կիս. Տիգրան Ժան Փիլիպպոսը: Հոգեպարար արարողութեան աւարտին՝ շնորհաւորութիւնները պիտի
ընդունուին վանքի դահլիճին մէջ:
Հայ եկեղեցւոյ ուսուցման համաձայն` հրեշտակները անմարմին գոյացութիւններ են, Աստուծոյ
իմացական, անձնիշխան, մշտաշարժ, անսեռ, անմահ և սպասաւորներ: Եկեղեցւոյ սուրբ հայրերուն
համաձայն` հրեշտակները, իբրեւ լուսեղեն էակներ, ստեղծուած են արարչագործութեան առաջին
օրը` լոյսի հետ միասին: Աստուծոյ հրահանգով անոնք կոչուած են սպասաւորելու մարդ արարածին:
Հետեւաբար անոնք սպասաւոր հոգիներ են, և երկնաբնակ ըլլալով հանդերձ, իրենց մասնակցութիւնը
կը բերեն նաեւ երկրաւոր կեանքի ընթացքին, կը գործեն ժամանակի և տարածքի մէջ ապրող մարդուն
համար: Հրեշտակները կը կոչուին նաեւ Աստուծոյ պատգամաւորներ, որոնք կ'իրականացնեն Տիրոջ
կամքը: Աստուածաշունչը կը վկայէ թէ անոնք բազմաքանակ են: Ըստ Դիոնիսիոս Արիսպագացիի`
հրեշտակները ունին ինը դաս` Աթոռներ, Քերովբէներ, Սերովբէներ, Տէրութիւններ, Զօրութիւններ,
Իշխանութիւններ, Պետութիւններ, Հրեշտակապետեր և Հրեշտակներ:
«Գաբրիէլ» անունը, որ կը նշանակէ «Աստուծոյ ուժը», Բարձրեալի անմիջական պաշտօնեան է,
որուն վերապահուած է Տիրոջ վերին խորհուրդները աւետարանելու շնորհքը: Այս հրեշտակապետն
է, որ ուղարկուած էր Տիրոջ կողմէն, Սուրբ Կոյս Մարիամին աւետելու անոր բարի լուրը, իսկ
Զաքարիային` Ս. Յովհաննէս Մկրտչի ծննդեան աւետիսը:
«Միքայէլ» անունը, որ կը նշանակէ «Ո՞վ է Աստուծոյ նման», Երկնաւոր Արքայի փառքի և անոր
ժողովուրդի պաշտպանութեան համար մարտնչողն է, որուն տրուած է կառավարելու և թագաւորելու
շնորհքը: Ս. Միքայէլ հրեշտակապետի անունը չորս անգամ վկայակոչուած է Սուրբ Գրքին մէջ
(Դան. 10:13 և 11:1, Յուդ. 1:9, Յայտն. 11:7):
Ռաֆայէլ անունը կը նշանակէ «Աստուծոյ դեղը-դարմանը»:
| All the contents on this site are copyrighted ©. |