Пантыфіка засмуціла ўцечка канфідэнцыйных дакументаў

“Ідзём наперад, спакойна і цвёрда”, - так адрэагаваў Святы Айцец на навіны аб уцечцы канфідэнцыйных дакументаў з Ватыкана. Яго словы цытуе субстытут у Дзяржаўным сакратарыяце, арцыбіскуп Анджэла Бэчу.

Арышт вінаватых у перадачы канфідэнцыйных матэрыялаў і сённяшняя прэм’ера кніг на аснове ватыканскіх дакументаў выклікала зразумелы ажыятаж. Таму справу пракаментавалі і высокапастаўленыя іерархіі. Усе згодныя з тым, што, хоць гэтыя падзеі засмучаюць Папу, нішто не можа змяніць яго намераў.

Старшыяня Папскай рады па інтэрпрэтацыі заканадаўчых тэкстаў лічыць, што не можна паддацца жаданню асоб, якія ўчынілі гэты скандал і які імкнуцца зрабіць уражанне, што ў Ватыкане адбываюцца дрэнныя рэчы. Аднак, трэба спытаць, сказаў кардынал Франчэска Кокапальмерыа, хто стаіць за гэтай справай за межамі Ватыкана. Ён нагадаў, што папская энцыкліка “Laudato si’”  закранула сур’ёзныя інтарэсы. З іншага боку, іерарх ясна паказаў таксама на тых, хто не падзяляе папскага погляду на душпастырства. “Яго выступленні і пастырская інтуіцыя, згодныя з дактрынальнай традыцыяй Касцёла, набіраюць усё большай і большай важнасці, а ў некаторых, верагодна, гэта выклікае занепакоенасць”, - лічыць кардынал Кокапальмерыа.

Пра добра спланаваную аперацыю, якая стаіць за ўцечкай канфідэнцыйных дакументаў, сказаў таксама біскуп Марчэла Сэмерара, сакратар Рады кардыналаў па дапамозе Святому Айцу ў кіраванні Касцёлам і рэформе Рымскай курыі. На яго думку, гэта наўмыснае дзеянне, мэтай якога з’яўляецца блакаванне папскіх рэформ. Ён рашуча дадаў, што нішто не можа спыніць Францішка на абраным шляху.