Papa: Doktoratura për Bartolomeun I, kontribut në rrugën drejt bashkimit

Doktoratura “honoris causa” në Kulturën e bashkimit, që Instituti Universitar Sofia i Loppiano-s i dha Paktriarkut Ekumenik të Kostandinopojës, Bartolomeut I, “kontribuon në rrugën drejt bashkimit të plotë e të dukshëm, të cilin e synojmë me përkushtim e këmbëngulje”. Kështu shkruan Papa Françesku në mesazhin me të cilin përgëzon gjestin e Institutit, kështjellë e Lëvizjes së Fokolarinëve. Në dhënien e titullit qenë të pranishëm përfaqësues nga Kishat ortodokse të Evropës Lindore dhe të Lindjes së krishterë, për të dëshmuar, siç tha kryetarja e Lëvizjes së Fokolarinëve, Maria Voce, “dëshirën për të ecur së bashku në të gjitha nivelet, drejt bashkimit”.

 Në motivacion, Patriarku konsiderohet pionier në rrugën e ekumenizmit, si edhe promovues aktiv i paqes dhe i drejtësisë. Papa Françesku e nënvizon këtë, duke e quajtur “vëlla i dashur” e duke i shprehur stimën dhe vlerësimin e  tij. Ndërkaq, në një fjalim të gjatë, Patriarku vetë e shtriu mbi të gjithë “Kishën martire të Kostandinopojës”, nderin për marrjen e titullit. Pastaj, përshkoi historinë e marrëdhënieve ndërmjet Kishës së Lindjes dhe asaj të Perëndimit, u ndal në ndarjen e dhimbshme, që zgjati me shekuj, për të arritur deri tek njohja e tjetrit si i krishterë. Që këndej, theksoi, rrodhi ndryshimi i gjuhës dhe i sjelljes së anasjelltë, duke filluar me marrëdhëniet ndërmjet Papës Gjoni XXIII dhe Patriakut Atenagora. Ata sollën një “kulturë të re bashkimi” dhe dëshirën “për të ecur së bashku.