Երանուհի Քալքութայի Մայր Թերեզայի երանացման 12-րդ տարեդարձը։

(Ռատիօ Վատիկան) Այսօր` երկուշաբթի 19 հոկտեմբեր 2015-ին, կը նշուի Երանուհի Քալքութայի Մայր Թերեզայի երանացման 12-րդ տարեդարձը։ Արդարեւ Ան խորաններու պատուոյն արժանացաւ 19 հոկտեմբեր 2003-ին, Սուրբ Յովհաննէս Պօղոս Բ Քահանայապետի օրով։

Քալքութայի Մայր Թերեզան աւազանի անունով Ագնէս Գոնճա Պոյաճիու, ալպաներեն՝ Agneze Gonxhe Bojaxhiu, ծնած էր 26 օգոստոս 1910-ին Ալպանիայի Սքոփիէ քաղաքին մէջ։ 

21 տարեկանին կը նուիրուի կուսակրօնութեան ստանալով Թերեզա անունը ու յետագային կը հիմնէ ''գթութեան քոյրերու'' միաբանութիւնը։ 1979-ին կ՛արժանանայ Խաղաղութեան Նոպէլեան մրցանակին։ Իր մահկանացուն կը կնքէ Քալքութայի մէջ` 1997-ի սեպտեմբերի 5-ին, 87 տարեկանին։

Ան բոլոր կեանքն ու առաքելութիւնը նուիրած է ի սպաս աղքատներուն եւ ամենայետիններուն։ Մայր Թերեզայի հիմնած եղբայրասիրական միաբանութիւնը  տարածուած է Համայն աշխարհ, ներառեալ Հայաստան ուր 1988-ին, Սպիտակ գիւղը հարուածող ահեղ երկրաշարժի օրերուն, Մայրը Թերեզա, առաքելութիւն մը  հաստատած է այնտեղ, որ կը շարունակէ գործել մինչեւ օրս։

Վերջին այս օրերուն, հայկական միջավայրի մէջ, տարածուեցաւ այն լուրը թէ Մայր Թերեզայի իսկական անունն եղած է` Ագնեսա Պոյաճեան։  Այս մասին տեղեկացուցած է ինքնին Մայր Թերեզան երբ 88-ի երկրաշարժէն յետոյ գալով Հայաստան՝ հանդիպում ունեցած է Վազգեն Ա երջանկայիշատակ Կաթողիկոսին հետ։ Վերոնշեալ լուրին մասին արտայայտուած է Արցախի թեմի առաջնորդը, հաստատելով թէ  ''Հանդիպման ընթացքին Մայր Թերեզան կաթողիկոսին պատմած է իր հայկական ծագման մասին: Անոր իսկական ազգանունը Պոյաճեան է, հայրը՝ Արեւմտեան Հայաստանէն գաղթած է Ալպանիա, մայրն ալ ալպանուհի քրիստոնեայ է: Իսկ հանդիպումէն անմիջապէս յետոյ, երբ 20-25 միաբաններով հաւաքուած էինք, Վազգէն Առաջինը, որ այս լուրը իմանալով ոչ միայն ուրախացած էր, այլ նաեւ զարմացած, այդ մասին պատմեց մեզի'' ըսած է Արցախի թեմի առաջնորդ Պարգեւ արքեպիսկոպոս Մարտիրոսեանը։