Չորեքշաբթի 14 Հոկտեմբեր 2015-ին, առաւօտեան ժամը 11:00-ին, Զմմառու Ս. Տիրամօր վանք
այցելեց Հայ գրող և մտաւորական՝ Պրն. Գրիգոր Պլտեան և իր կողակիցը Տիկ. Անին, ընկերակցութեամբ
Համազգայինի աշխատակից՝ Շաղիկ Փափազեան Մկրտչեանի: Տեղին է յիշել թէ Պրն. Գրիգոր Պլտեան
լիբանահայ է, որ ներկայիս Փարիզ կ'ապրի: Ան միաժամանակ բանաստեղծ է, վիպասան, փիլիսոփայութեան
դոկտոր և աստուածաբան:
Ս. Գրիգոր Նարեկացիի մասին գրած է երեք հատորով ուսումնասիրութիւններ, որ 2006-ին Երեւան
լոյս տեսած է մէկ հատորով «Երկխօսութիւն Նարեկացիի հետ» խորագրով: 20 տարի Լիոնի համալսարանի
Գալուստ Կիւլպենկեանի հիմնած՝ հայագիտական ամպիոնի ուսուցիչ եղած է և դասաւանդած է աստուածաբանութիւն
և հայ մատենագիտութիւն: Զանազան յօդուածներ գրած է հայերէն և ֆրանսերէն Ս. Գրիգոր Նարեկացիի
մասին:
Վերջերս իր «Աստուածաշունչը Հայ գրականութեան մէջ» վերնագրով աշխատութիւնը լոյս տեսած
է ֆրանսական համայնագիտարանի մը մէջ:
Ս. Գրիգոր Նարեկացիի մասնագէտ կրնանք համարել, որուն մասին երկար տարիներ դասաւանդած
է, և անոր Մատեանը իր ընթերցման և ուսումնասիրութեան մշտական նիւթ եղած է: Ունի նաեւ
ֆրանսերէն գիրք մը Ֆրանսահայ գրականութեան մասին (1920-1972):
Յարգելի հիւրերը նախ շրջագայեցան Զմմառու վանքի զանազան մասերը. մայր Տաճար, մատուռ,
ապա նաեւ՝ վանքի թանգարանն ու գինեմառանը և մօտէն ծանօթացան դարաւոր վանքի հայ մշակութային
ժառանգութեան, մեծ հետաքրքռութիւն ցուցաբերելով հոգեւոր արժէքներուն, անոր անցեալին ու
ներկային պատմութեան, անոր հիմնադրութեան օրէն (1749) մինչեւ այս օրերս:
All the contents on this site are copyrighted ©. |