Անգլիոյ եպիսկոպոսները կոչ կ՛ուղղեն Սուրբ Երկրին մէջ դադրեցնելու բռնութիւնները։

(Ռատիօ Վատիկան) Գերապայծառ Տէքլան Լանկ` Անգլիոյ եպիսկոպոսաց համահաւաք դասի` միջազգային յարաբերութիւններու յանձնախումբի նախագահը, կոչ ուղղած է Իսրայէլեան եւ պաղեստինեան իշխանութիւններուն, հրաւիրելով մէկդի դնել ''աչք աչքի դէմ'' քաղաքականութիւնը եւ փոխադարձ մեղադրութիւնները''։ Ան ապա իր խոր մտահոգութիւնը յայտնած է ի տես Երուսաղէմի մէջ տեղի ունեցող ծաւալուն բռնութիւններուն։

Գերապայծառ Լանկ որ է նաեւ ''Սուրբ Երկրի համակարգումի'' նախագահ­, յայտնած է թէ  Սուրբ Երկիր կատարած իր ճամբորդութիւններու ընթացքին­, ականատես եղած է Պաղեստինցիներու վրդովումին, որոնց համար մահը դարձած է յաճախ իրենց տառապանքին միակ յոյսը։ Բայց եւ այնպէս, ընդգծած է գերապայծառ Լանկ,  վստահ եմ, թէ այս յուսահատութիւնը չի կրնար հսկողութենէ դուրս բռնութեան վերածուիլ եւ թէ Իսրայէլեան իշխանութիւնները պարտականութիւնն ունին օրէնքը պարտադրելու։

Ան ապա վերյիշելով Երանելի Պօղոս Զ քահանայապետի խօսքերը, մատնանշած է թէ խաղաղութիւնը կը պահանջէ արդարութիւն, ապա թէ ոչ` մարդկային յարաբերութիւնները կ՛այլափոխուին եւ բռնութիւնը կը տարածուի։ 

Գերապայծառ Լանկ հուսկ կոչ ուղղած է  վերստանձնելու  խաղաղութեան դժուար ճանապարհի յանձնառումը, որ  հիմնուած ըլլայ արդարութեան վրայ, որուն հիման վրայ երկու կողմերը կարենան ապրիլ ապահովութեան մէջ, իրենց ինքնավար պետութիւններու ներքոյ։