Святы Пасад заклікаў да змен у міжнародным праве

Святы Пасад прапануе дапоўніць міжнароднае права з улікам апошніх падзей у свеце і патрэбай у вырашэнні шматлікіх канфліктаў і гуманітарных крызісаў. Аб гэтым казаў сакратар па адносінах Апостальскай Сталіцы з дзяржавамі арцыбіскуп Пол Галахер падчас канферэнцыі аб “новых абліччах вайны”, якая 9 кастрычніка 2015 г. прайшла ў Рыме па ініцыятыве руху “Каталіцкая акцыя” і Інстытута па праблемах міжнароднага мірнага права імя Джузэпэ Таньёла.

Ватыканскі дыпламат падкрэсліў, што ў сферы прадухілення канфліктаў і абароны мірнага насельніцтва ў гуманітарным праве павінна быць нададзена большае значэнне прынцыпу “адказнасці за абарону”, які абавязвае міжнародную супольнасць бараніць людзей ад генацыду і пераследу па рэлігійных ці этнічных матывах. Прынцып “адказнасці за абарону” можа таксама ўжывацца з мэтай гарантавання бежанцам магчымасці вярнуцца на родную зямлю і валодаць сваёй уласнасцю, а таксама жыць з годнасцю і ў бяспецы ва ўласных краінах і асяроддзях, сказаў ён.

Арцыбіскуп Галахер узгадаў эвалюцыю форм вядзення вайны на працягу апошняга стагоддзя, звярнуўшы ўвагу на новыя выклікі, звязаныя з выкарыстаннем права дзеля “павелічэння магчымасцяў легітымнага звароту да вайсковых інструментаў, як вырашэння міжнародных супярэчнасцяў” – стратэгію накіраваную на “нагінанне” нормаў і правоў з мэтай “больш шырокага выкарыстання і простага доступу да ўжывання сілы”.

Гаворачы аб праблеме тэрарызму, ватыканскі дыпламат назваў гэты феномен “самай вялікай формай дэградыцыі вайны, вядомай да гэтага часу”.