Հայկական երկու եկեղեցիներ աշխարհի ամենագեղեցիկներու ցանկին մէջ

The Telegraph պարբերականը հրապարակած է աշխարհի ամենագեղեցիկ եկեղեցիներուն ցանկը: Պարբերականի առանձնացուցած 23 եկեղեցիներու շարքին մէջ է նաեւ Իրանի մէջ գտնուող Սպահանի սուրբ Բեթղէհէմ հայկական եկեղեցին, կը գրէ Yerkirmedia կայքը:

Ըստ պարբերականին՝ հայկական եկեղեցին զարդարուած է 72 հիանալի նկարներով, որոնց մէջ` Վերջին ընթրիքի եւ դրախտէն վտարման տեսարաններով, գեղեկցութեամբ աչքի  կը զարնէ յատկապէս գմբէթը:

«Հակառակ հայերը օրէնքով պարտաւոր են ենթարկուելու իսլամական հագուստի օրէնքին, բայց անոնք կը պահպանեն իրենց մշակոյթը, ինքնութիւնը, լեզուն եւ 16 եկեղեցիները»,- գրած է բրիտանական պարբերականը:

Ամենագեղեցիկ եկեղեցիներու ցանկին մէջ ներառուած է նաեւ Իրանի հայկական մէկ այլ` Սուրբ Ստեփանոս եկեղեցին: Ըստ պարբերականին, կանաչ հարթավայրի մէջ մեկուսացուած հայկական եկեղեցին կը հերքէ այն պատկերցումները, թէ Իրան միայն անապատներու ու մզկիթներու երկիր է: